Saif Ali Khan: 'हल्लेखोराकडे एक नाही तर दोन चाकू...'; ८ महिन्यांनंतर सैफ अली खानने केला त्या रात्रीचा धक्कादायक खुलासा

Saif Ali Khan: १५ जानेवारी रोजी, बॉलीवूड अभिनेता सैफ अली खानच्या घरातून धक्कादायक घटना घडली. बाबा सिद्दीकीच्या क्रूर हत्येचे मुंबईत वातावरण असताना अभिनेता सैफ अली खानवर त्याच्या घरात चाकूने हल्ला करण्यात आला. त्याच्या मानेवर आणि पाठीवर अनेक जखमा झाल्या. सुदैवाने, अभिनेता लवकर बरा झाला.

आता, सैफने पहिल्यांदाच त्या रात्री काय घडले ते सविस्तरपणे सांगितले आहे. ट्विंकल खन्ना आणि काजोलच्या "टू मच" या शोमध्ये तो म्हणाला, "करीना (माझी पत्नी) त्या रात्री बाहेर गेली होती आणि मी मुलांसोबत (तैमूर आणि जेह) चित्रपट पाहून परत आलो होतो. आम्ही रात्री २ वाजता झोपायला जात होतो तेव्हाच करीना परतली, तेव्हा आम्ही थोडा वेळ गप्पा मारल्या आणि नंतर झोपायला गेलो. मग मोलकरीण आत आली आणि म्हणाली, 'जेह बाबाच्या खोलीत कोणीतरी आहे. त्याच्या हातात चाकू आहे आणि तो म्हणत आहे की त्याला पैशांची गरज आहे.'"

सैफ म्हणाला, “मी ते ऐकले आणि लगेच अंथरुणातून उठलो. मी जेहच्या खोलीत गेलो - अंधार होता आणि मला बेडवर एक माणूस चाकू धरून उभा असलेला दिसला.” त्यावेळी अक्षय कुमारने विचारले, “तो जेहला चाकू दाखवत होता का?” सैफ म्हणाला, “तो इतका हात हलवत होता की जेह आणि आया दोघांनाही जखम झाली. मला वाटले, 'तो माझ्यापेक्षा लहान आहे, म्हणून मी त्याला पकडू शकतो.' म्हणून मी त्याच्यावर झडप घातली आणि भांडण सुरू झाले. तो वेडा झाला. त्याच्याकडे दोन चाकू होते आणि तो माझ्यावर वार करू लागला.

सैफ म्हणाला, “मी माझ्या ट्रेनिंगमुळे काही वार रोखले. पण नंतर मला पाठीत जोरदार वार लागला. तोपर्यंत घरातील इतर लोक बाहेर आले. आमची मोलकरीण गीता मदतीला आली आणि हल्लेखोराला माझ्यापासून वेगळे केले. तिने माझा जीव वाचवला, कारण तोपर्यंत मला आधीच अनेक ठिकाणी जखमा झाल्या होत्या. शेवटी आम्ही त्याला एका खोलीत बंद केले.”