Ranveer Singh: ‘धुरंधर २’ चित्रपटाच्या यशाचा जल्लोष सुरू असतानाच अभिनेता रणवीर सिंग नव्या वादात अडकला आहे. मंगळवार, २४ मार्च रोजी कर्नाटक उच्च न्यायालय येथे झालेल्या सुनावणीदरम्यान रणवीरने ‘कांतारा’ चित्रपटातील एका सीनची विचित्र पद्धतीने नक्कल केल्याबद्दल बिनशर्त माफी मागण्याचा इरादा व्यक्त केला. यासाठी तो प्रतिज्ञापत्र (अ‍ॅफिडेव्हिट) दाखल करणार असल्याचेही त्याच्या वकिलांनी न्यायालयात सांगितले.

चामुंडी मंदिरात जाऊन प्रार्थना

इतकेच नव्हे, तर आपल्या चुकीबद्दल क्षमा मागण्यासाठी तो चामुंडी मंदिर येथे जाऊन प्रार्थना करेल, असेही स्पष्ट करण्यात आले. मात्र, या भूमिकेवर तक्रारदार पूर्णपणे समाधानी नसल्याचे दिसून आले. त्यांनी न्यायालयात असा युक्तिवाद केला की, रणवीरने सोशल मीडियावर माफी मागणे पुरेसे नाही, तर ती सार्वजनिकरित्या माफी आवश्यक आहे.

काय आहे नेमकं प्रकरण?

हा संपूर्ण वाद २०२५ मध्ये गोव्यात झालेल्या इंटरनॅशनल फिल्म फेस्टिव्हल ऑफ इंडिया दरम्यान घडलेल्या घटनेवरून सुरू झाला. त्या कार्यक्रमात रणवीरने ‘कांतारा’ चित्रपटातील ऋषभ शेट्टी यांच्या अभिनयाचे कौतुक करताना एका महत्त्वाच्या सीनची विचित्र पद्धतीने नक्कल करून दाखवली होती. पण या कृतीमुळे काहींच्या भावना दुखावल्याचा आरोप करण्यात आला.

यानंतर रणवीरविरोधात एफआयआर दाखल करण्यात आला असून, धार्मिक भावना दुखावल्याचा मुद्दा उपस्थित करण्यात आला आहे. सुनावणीदरम्यान रणवीरचे वकील साजन पूवय्या यांनी सांगितले की, अभिनेता लवकरच औपचारिक माफी मागेल आणि संबंधित प्रक्रिया पूर्ण करेल. दुसरीकडे, तक्रारदाराच्या वकिलांनी रणवीरची माफी 'दिखावा' असल्याचा आरोप केला. त्यांनी नमूद केले की, सोशल मीडियावरील पोस्ट ही पुरेशी नसून, प्रत्यक्ष मंदिरात जाऊन माफी मागणे गरजेचे आहे.

या प्रकरणात न्यायमूर्ती एम. नागप्रसन्ना यांनीही रणवीरचे वर्तन योग्य नसल्याचे निरीक्षण नोंदवले. मात्र, ही चूक अनावधानाने झाल्याचेही त्यांनी नमूद केले. या प्रकरणाची पुढील सुनावणी १० एप्रिल रोजी होणार असून, तोपर्यंत रणवीरने माफी मागितल्यास पुढील कारवाई थांबवण्याचा विचार केला जाऊ शकतो असे ते पुढे म्हणाले.