Ramayana Teaser: गेले वर्षभर ज्याची प्रेक्षक आतुरतेने वाट पाहत होते, त्या बहुप्रतिक्षित 'रामायण' चित्रपटाची झलक अखेर समोर आली आहे. हनुमान जयंतीच्या शुभ मुहूर्तावर निर्मात्यांनी हा खास टिझर प्रदर्शित करत चाहत्यांना मोठा सरप्राईज दिला. या झलकमध्ये रणबीर कपूर प्रभू रामा यांच्या भूमिकेत दिसत असून त्याचा लूक पाहून प्रेक्षक अक्षरशः मंत्रमुग्ध झाले आहेत.

सुमारे २ मिनिटे २८ सेकंदांचा हा व्हिडिओ केवळ पात्रांची ओळख करून देत नाही, तर चित्रपटाच्या भव्यतेचीही झलक दाखवतो. सुरुवातीला रामाचा डौलदार अवतार, हातात धनुष्य घेतलेला रणबीर कपूर आणि त्याच्यावर होणारा फुलांचा वर्षाव हे दृश्य प्रेक्षकांना भावूक करते. त्यानंतर वनवास, अयोध्येतील जनसमुदाय आणि राम-सीता-लक्ष्मण यांचा प्रवास अशा अनेक प्रसंगांची मांडणी यात पाहायला मिळते.

या चित्रपटात साई पल्लवी सीतेच्या भूमिकेत तर रवी दुबे लक्ष्मणाच्या भूमिकेत दिसणार आहेत. विशेष म्हणजे, व्हिडिओच्या शेवटी ‘रॉकिंग स्टार’ यश साकारणाऱ्या रावणाचीही झलक दाखवण्यात आली पण चेहरा पूर्णपणे उघड करण्यात आलेला नाही.

चित्रपटाचे निर्माते नमित मल्होत्रा यांनी या चित्रपटासाठी तब्बल ४,००० कोटी रुपयांचे बजेट असल्याचे सांगितले आहे. या भव्य चित्रपटाचा पहिला भाग दिवाळी २०२६ मध्ये प्रदर्शित होणार असून, दुसरा भाग दिवाळी २०२७ मध्ये प्रेक्षकांच्या भेटीला येणार आहे. १ मिनिट १४ सेकंद होताच या टिझरमध्ये रणबीर कपूरचा प्रभू राम अवतार पाहून चाहत्यांच्या अंगावर काटा येतो आणि याच क्षणाने संपूर्ण व्हिडिओचा हायलाइट ठरतो.