Priyanka Chopra : देसी गर्ल अशी अभिनेत्री प्रियंका चोप्राची ओळख आहे. बॉलिवूडमध्ये गाजवल्यानंतर प्रियंका आता हॉलिवूडमध्ये काम करत आहे. तिचा 'हेड ऑफ स्टेट' हा चित्रपट लवकरच प्रदर्शित होणार आहे. प्रियंकाच्या कुटुंबाने आगामी चित्रपटाचे खास स्क्रीनिंग आयोजित केले होते. या स्क्रीनिंग दरम्यानचे फोटो प्रियंका चोप्राने सोशल मीडियावर शेअर केले.

प्रियंका चोप्राने तिच्या इन्स्टाग्राम अकाउंटच्या स्टोरीवर चित्रपटाच्या स्क्रीनिगंदरम्यानचे काही फोटो पोस्ट केले. या फोटोंची सोशल मीडियावर सध्या चर्चा पाहायला मिळत आहे. यात पाकिस्तानी फिल्ममेकर शर्मिन ओबैद चिनॉय प्रियंकासोबत दिसत आहे. प्रसिद्ध दिग्दर्शिका मीरा नायर देखील फोटोमध्ये पोज देत असल्याचे दिसते. पाकिस्तानी फिल्ममेकरसोबतचे फोटो शेअर केल्याने प्रियंका चोप्रा सध्या चर्चेत आहे.

दिलजीत दोसांझनंतर प्रियंका चोप्रा चर्चेत

पंजाबी गायक आणि अभिनेता दिलजीत दोरांझ त्याच्या सरदार जी ३ या चित्रपटामुळे चर्चेत आहे. ट्रेलर प्रदर्शित झाल्यापासूनच हा चित्रपट आणि दिलजीत दोघेही वादाच्या भोवण्यात अडकले आहेत. या चित्रपटामध्ये पाकिस्तानी अभिनेत्री हानिया आमिरने काम केले आहे. ऑपरेशन सिंदूरदरम्यान भारत आणि पाकिस्तान यांच्यातील तणाव वाढल्याने भारतीय चित्रपटात पाकिस्तानी अभिनेत्रीला घेतल्याने दिलजीत दोसांझवर टीका होत आहे.

दिलजीत दोसांझ यांच्यानंतर आता प्रियंका चोप्रा वादात अडकल्याचे म्हटले जात आहे. प्रियंका चोप्राचा 'हेड ऑफ स्टेट' हा चित्रपट २ जुलै रोजी चित्रपटगृहात प्रदर्शित होणार आहे. या चित्रपटाचे खास स्क्रीनिंग प्रियंकाच्या कुटुंबीयांनी आयोजित केले होते. यादरम्यान पाकिस्तानी कॅनेडियन फिल्ममेकर शर्मिन ओबैद चिनॉयला भेटल्यानंतर नव्या वादाला सुरुवात झाल्याचे म्हटले जात आहे.