Nashik : आजीने नदीत उडी घेतली, क्षणाचाही विलंब न करता तरुण जीव वाचवण्यासाठी धावला, प्रसंगावधानं सर्वत्र कौतुक

फैयाज शेख, साम टीव्ही, प्रतिनिधी

नाशिकमधील शहापूर येथून एक धक्कादायक प्रकार घडला आहे. शहापूरमध्ये एका वयोवृद्ध आजीने भातसा नदीच्या पात्रात उडी मारुन आत्महत्या करण्याचा प्रयत्न केला. नदीच्या बाजूला किनाऱ्यावर असलेल्या एका तरुणाने नदीत उडी मारुन आजीचे प्राण वाचवले. त्यानंतर आजीला उपचारासाठी रुग्णालयात नेण्यात आले.

मिळालेल्या माहितीनुसार, शहापूर तालुक्यातील सापगाव येथील भातसा नदीवरील पूलावरुन एका वृद्ध महिलेने नदीत उडी घेतली. हे दृश्य पाहून नदीच्या दुसऱ्या बाजूच्या किनाऱ्यावर असलेल्या रितेश बसवंत या तरुणाने क्षणाचाही विलंब न करता भातसा नदीमध्ये उडी मारली. पोहत हा तरुण महिलेपर्यंत पोहोचला आणि त्याने वृद्ध महिलेला पाण्यातून बाहेर काढले.

नदीपात्रात उडी मारुन जीव देण्याचा प्रयत्न करणाऱ्या आजीला वाचवणाऱ्या रितेश बसवंत याचे परिसरात कौतुक केले जात आहे. यादरम्यान वृद्ध आजीला प्राथमिक उपचारांसाठी शहापूर येथील उपजिल्हा रुग्णालयात दाखल करण्यात आले आहे. वृद्ध महिलेने नदीत उडी मारण्याचा प्रयत्न का केला याचा तपास सुरु आहे.