प्रवीण तरडेंचा बहुप्रतीक्षित चित्रपट 'देऊळ बंद २' रिलीज झाला आहे. स्वामींचा हा चित्रपट २१ मे (गुरूवारी) पासून थिएटरमध्ये सुरू झाला. या चित्रपटाची प्रेक्षक आतुरतेने वाट पाहत होते. या चित्रपटाला दोन दिवसांत भरपूर प्रेम मिळाले आहे. 'देऊळ बंद २'ने दोन दिवसांत बक्कळ कमाई केली आहे. 'देऊळ बंद २'ची कमाई शेतकऱ्यांच्या मुला-मुलींच्या शिक्षणासाठी देण्यात येणार असल्याची घोषणा दिग्दर्शक प्रवीण तरडे यांनी केली. या चित्रपटाची दुसऱ्या दिवसाची कमाई, जाणून घेऊयात.

'देऊळ बंद २' बॉक्स ऑफिस कलेक्शन दिवस २

'देऊळ बंद २' चित्रपटाने पहिल्या दिवशी ३.०५ कोटी रुपयांची कमाई केली. त्यानंतर Sacnilk च्या रिपोर्टनुसार, प्रवीण तरडेंच्या 'देऊळ बंद २' चित्रपटाने दुसऱ्या दिवशी म्हणजे शुक्रवारी जवळपास २.५५ कोटींची कमाई केली. 'देऊळ बंद २' सिनेमाचे दुसऱ्या दिवशी १२३६ शो होते. ज्यामुळे चित्रपटाची दोन दिवसांची एकूण कमाई ५ कोटी रुपयांच्या वर झाली आहे.

'देऊळ बंद -2'मध्ये ज्येष्ठ अभिनेते मोहन जोशी श्री स्वामी समर्थांची भूमिका साकारली आहे. चित्रपटाची कथा, संवाद आणि दिग्दर्शन प्रवीण तरडे यांनी केले आहे. महिला शेतकऱ्याच्या भूमिकेत स्नेहल तरडे दिसली आहे. 'देऊळ बंद -2' चित्रपटाचा मुख्य हेतू शेतकऱ्यांच्या आत्महत्यांना आळा घालणे हा आहे. आत्महत्या करून शेतकऱ्यांचे प्रश्न सुटत नाहीत, तर बदलत्या परिस्थितीनुसार शेतीत बदल करण्याची गरज आहे, असा ठाम संदेश या चित्रपटातून दिला गेला आहे.

'देऊळ बंद -2' स्टारकास्ट

'देऊळ बंद -2' चित्रपटात प्रवीण तरडे, स्नेहल तरडे आणि मोहन जोशी हे कलाकार मुख्य भूमिकेत झळकले आहेत. तर महेश मांजरेकर, प्रसाद ओक, मंगेश देसाई, देवेंद्र गायकवाड,रमेश परदेशी,ओम भूतकर, सुनील अभ्यंकर, संस्कृती बालगुडे, मुकुंद वसुले, अतुल कुदले, अनिरुद्ध दिंडोरकर आणि हिृषीकेश वांबुरकर यांनी महत्त्वाच्या भूमिका साकारल्या आहेत.