Pawan Singh Wife: बिहार विधानसभा निवडणुकीच्या पहिल्या टप्प्यासाठी मतदान सुरू झाले आहे. यावेळी अनेक भोजपुरी स्टार निवडणूक लढवत आहेत. यावेळी भोजपुरी पॉवरस्टार पवन सिंह यांच्या पत्नी ज्योती सिंह देखील निवडणूक लढवत आहे. ज्योती बिहारमधील करकट विधानसभा मतदारसंघातून अपक्ष उमेदवार आहे.

ज्योती आपला जोरदार प्रचार करत आहे. घरोघरी जाऊन तिला मतदान करण्यासाठी आवाहन करत आहेत. अपक्ष निवडणूक लढवत असलेल्या ज्योतीला अनेक आर्थिक अडचणींचा सामना करावा लागत असल्यामुळे तिने इंस्टाग्रामवर आर्थिक मदत करण्याची विनंती केली आहे.

क्यूआर कोड शेअर करत ज्योतीने लिहिले, "राम आणि कृष्णासारख्या अवतारांनाही समाजाकडून खूप काही सहन करावे लागले. त्यांच्यासमोर मी तर एक तुच्छ महिला आहे. अनेक अत्याचार सहन करूनही काही जण माझ्यावर आरोप करतात. काही लोकांना माझ्या अश्रूंमध्ये फसवणूक आणि ढोंग दिसते. पण माझ्यासारख्या लाखो पीडितांच्या आवाजाला बळ देण्यासाठी, मी करकट विधानसभा मतदारसंघातून निवडणूक लढवत आहे."

ज्योती सिंहने पुढे लिहिले, "मला जनतेचा प्रचंड पाठिंबा मिळत आहे. कृपया या निवडणूक मोहिमेला आणखी बळ देण्यासाठी मदत करा आणि खालील क्यूआर कोडवर देणगी पाठवा. मी मोठ्या आशेने तुमच्या दाराशी हात जोडून उभी आहे. गेल्या निवडणुकीपासून आजपर्यंत, मी करकट सोडले नाही आणि मी नेहमीच तुमच्या सुख-दु:खात सहभागी असते. आज, तुमची ही मुलगी तुमच्याकडे मदत मागते आहे." यापूर्वीही, दिवाळीच्या काळात, ज्योती सिंहने जनतेकडून आर्थिक मदत मागणारी एक पोस्ट शेअर केली होती, परंतु नंतर ती डिलीट केली.