'हेरा फेरी 3'च्या (Hera Pheri 3) चाहत्यांसाठी एक आनंदाची बातमी आहे. 'हेरा फेरी 3'मध्ये बाबू भैयाची धमाकेदार एन्ट्री झाली आहे. मीडिया रिपोर्टनुसार, 'हेरा फेरी 3'मध्ये बॉलिवूड अभिनेते परेश रावल हे बाबुरावच्या भूमिकेत पाहायला मिळणार आहे. काही दिवसांपूर्वी परेश रावल यांनी 'हेरा फेरी 3'मधून एक्झिट घेतल्याची बातमी समोर आली होती. त्यामुळे चाहते प्रचंड नाराज होते. क्रिएटिव्ह मतभेदांमुळे परेश रावल यांनी चित्रपट सोडला होता. असे बोले गेले होते.

नुकत्याच एका मिडिया मुलाखतीत परेश रावल यांनी सांगितले की, "आमच्यातले सर्व वाद मिटले आहेत. मी 'हेरा फेरी 3'चा भाग आहे. मी चित्रपटात बाबुराव गणपतराव आपटे हे पात्र साकारणार आहे. आता आमच्यात कोणताही वाद नाही आहे. 'हेरा फेरी' सारखा सिनेमा एकदाच बनतो. सतत तसेच केल्यास त्यात नवीनपणा राहत नाही. जेव्हा प्रेक्षकांना एखादी गोष्ट आवडते तेव्हा ती अधिक काळजी पूर्वक करावी लागते. आपण प्रेक्षकांना गृहीत धरू शकत नाही. त्यामुळे चांगला चित्रपट तयार करणे ही आपली जबाबदारी आहे. "

पुढे परेश रावल (Paresh Rawal) म्हणाले की, "आम्ही सर्व एकत्र येऊ, मेहनत करू. सर्व प्रोब्लेम सुटले आहेत. 'हेरा फेरी 3' नक्की येत आहे. येथे सगळेच क्रिएटिव्ह लोक असल्यामुळे जरा एकमेकांना फाइन ट्यून करावे लागते. अक्षय, सुनील आणि प्रियदर्शन हे सर्वच माझे मित्र आहेत. "

'हेरा फेरी 3' चित्रपट

'हेरा फेरी 3' हा चित्रपट 'हेरा फेरी' फॅन्चायजीचा तिसरा भाग आहे. 'हेरा फेरी' चित्रपट 2000 साली प्रेक्षकांच्या भेटीला आला होता. त्यानंतर 2006ला 'फिर हेरा फेरी' चित्रपट रिलीज करण्यात आला. मीडिया रिपोर्टनुसार, 'हेरा फेरी 3' नवीन वर्षात 2026 ला प्रेक्षकांच्या भेटीला येणार आहे. चाहते 'हेरा फेरी 3' साठी उत्सुक असल्याचे पाहायला मिळत आहे.