Suniel Shetty On Here Pheri 3: बॉलिवूडच्या सर्वात लोकप्रिय कॉमेडी फ्रँचायझींपैकी एक असलेल्या 'हेरा फेरी'च्या तिसऱ्या भागाची चाहत्यांना मोठ्या उत्सुकतेने वाट पाहत होती. मात्र, या चित्रपटाच्या निर्मितीत अचानकच मोठा वळण आले आहे. बाबूभाईया म्हणून ओळखले जाणारे परेश रावल यांनी 'हेरा फेरी 3' मधून माघार घेतल्याची बातमी समोर आली आहे. या निर्णयाने चाहत्यांमध्ये आणि सहकलाकारांमध्येही खळबळ उडाली आहे.

अभिनेता सुनील शेट्टी, जो 'हेरा फेरी'मध्ये श्यामची भूमिका साकारतो, त्यांने या घटनेवर प्रतिक्रिया दिली आहे. त्यांने ANI शी बोलताना सांगितले की, "हा माझ्यासाठी मोठा धक्का आहे आणि मी पूर्णपणे हताश झालो आहे. जर अशी एक फिल्म असेल ज्याची मी आतुरतेने वाट पाहत होतो, तर ती 'हेरा फेरी' होती. ही फिल्म 100% परेश रावलशिवाय बनू शकत नाही."

या प्रकरणात आणखी एक वळण म्हणजे अक्षय कुमार यांच्या प्रोडक्शन हाऊस 'केप ऑफ गुड फिल्म्स'ने परेश रावल यांना 25 कोटी रुपयांची कायदेशीर नोटीस पाठवली आहे. या नोटीसमध्ये चित्रपटातून अचानक बाहेर पडल्यामुळे झालेल्या आर्थिक नुकसानाची भरपाई मागण्यात आली आहे. परेश रावल यांनी त्यांच्या निर्णयामागील कारण स्पष्ट केले नाही, परंतु काही अहवालांनुसार, त्यांनी अधिक मानधनाची मागणी केली होती, जी पूर्ण न झाल्यामुळे त्यांनी चित्रपटातून माघार घेतली.

'हेरा फेरी' फ्रँचायझीतील त्रिकूट - अक्षय कुमार, सुनील शेट्टी आणि परेश रावल यांची केमिस्ट्री प्रेक्षकांच्या मनात विशेष स्थान निर्माण करते. त्यामुळे या त्रिकुटातील कोणताही बदल चाहत्यांसाठी निराशाजनक ठरू शकतो. आता या वादामुळे 'हेरा फेरी 3' होणार कि नाही असा प्रश्न निर्माण झाला आहे.