'चला हवा येऊ द्या'मधून घराघरात पोहचलेला कॉमेडीचा किंग निलेश साबळेने (Nilesh Sable) प्रेक्षकांना मोठे सरप्राइज दिले आहे. निलेश साबळेने 'चला हवा येऊ द्या'मध्ये आपल्या कॉमेडी अंदाज आणि हटके सूत्रसंचालनाने प्रेक्षकांची मने जिंकली. आता पुन्हा एकदा तो नवीन शो घेऊन प्रेक्षकांच्या भेटीला आला आहे. ज्याचे पोस्टर त्याने नुकतेच सोशल मीडियावर पोस्ट केले आहे.

निलेश साबळेने शेअर केलेल्या पोस्टमध्ये त्याचा स्माइल करणारा फोटो मध्यभागी दिसत आहे आणि पाठीमागे महिला वर्ग आनंदाने नाचताना दिसत आहे. निलेश साबळेच्या नवीन कोऱ्या शोचे नाव 'वहिनीसाहेब सुपरस्टार' असे आहे. पोस्टरला हटके कॅप्शन देण्यात आले आहे. लिहिलं की, "महाराष्ट्रातील तमाम आदरणीय वहिनींसाठी एक आगळा वेगळा शो…धमाल खेळ, गप्पा , कॉमेडी, संगीत , बक्षिसे आणि बरंच काही…!" निलेशचा नवीन शो त्याच्या लाडक्या वहिनींसाठी असणार आहे. पोस्टमध्ये संपर्क क्रमांक देखील सांगण्यात आला आहे.

निलेश साबळे 'वहिनीसाहेब सुपरस्टार' शोचे होस्टिंग करणार आहे. त्याच्या या पोस्टवर चाहत्यांकडून कमेंट्सचा वर्षाव होत आहे. प्रेक्षक आता या कार्यक्रमासाठी खूप उत्सुक आहेत. अद्याप या शोची रिलीज डेट जाहीर झाली नाही. अलिकडे निलेश साबळे 'ढिंचॅक दिवाळी 2025' मधून प्रेक्षकांच्या भेटीला आला. या शोमध्ये भाऊ कदम देखील झळकला.

निलेश साबळे एक उत्तम अभिनेता, सूत्रसंचालक, दिग्दर्शक आणि लेखक आहे. 'कॉमेडी आणि बरंच काही', 'हसताय ना हसायलाचं पाहिजे', 'नवरा माझा भवरा' या शोमधून देखील प्रेक्षकांच्या भेटीला आला. आता 2025 मध्ये 'चला हवा येऊ द्या'चे नवीन पर्व सुरू झाले आहे.