Bhakti Gothankar, Saam Tv

Khashaba Movie : मराठी चित्रपटसृष्टीचा डंका चहुबाजूंना गाजवणारे दिग्दर्शक नागराज मंजुळे आणखी एक नवा कोरा सिनेमा घेऊन आपल्या भेटीला येणार आहेत. नागराज मंजुळे दिग्दर्शित फँड्री,सैराट,नाळ यांसारख्या मराठी गावरान चित्रपटांनी देशभरातील लाखो प्रेक्षकांना वेड लावले. अनेक राज्यस्तरीय पुरस्कार देखील या सिनेमांनी पटकावले.

कोल्हापूरची लाल मातीमधील कुस्ती ऑलिंपिकमध्ये गाजवून महाराष्ट्रासाठी पहिले वैयक्तिक मेडल जिंकणार्या खाशाबा जाधवांचा प्रवास आपल्याला मोठ्या पडद्यावर पाहायला मिळणार आहे. खाशाबा जाधव या सिनेमाचा ट्रेलर लॉंच झाला असून या सिनेमात कोणता नवा चेहरा झळकणार याची उत्सुकता आता प्रेक्षकांना लागली आहे.

खाशाबा जाधव यांनी १९५२ साली अत्यंत प्रतिकूल परिस्थितीत हेलसिंकी ऑलिंपिकमध्ये कांस्यपदक पटकावले आणि भारतील क्रिडा विश्वात सुवर्णअक्षरांनी इतिहास घडवला.नागराज मंजुळे यांच्या सिनेमांचे वैशिष्ट्य म्हणजे प्रमुख भूमिका बजावणारा नट. नव्या सिनेमांसोबतच मराठी चित्रपटसृष्टीला नवे कोरे चेहरे मिळतात आणि पहिल्याच सिनेमात प्रसिद्धही होता.

नागराज मंजुळे दिग्दर्शित खाशाबा जाधव या सिनेमाचा ट्रेलर लॉंच झाला असून जितेंन्द्र जोशी, महेश मांजरेकर, गिरिश कुलकर्णी, संदीप कुलकर्णी, संदेश कुलकर्णी, सुरेश विश्वकर्मा, वैभव मांगले, छाया कदम आणि गार्गी कुलकर्णी यांसारख्या उत्कृष्ट कलाकरांची फळी आपल्याला या सिनेमात पाहायला मिळणार आहे. परंतु मुख्य खाशाबा जाधव यांची भूमिका साकारणाऱ्या कलाकाराचे नाव अद्याप समोर आलेले नाही.

टिझरमध्येही अभिनेत्याचा चेहरा थेट दाखवलेला नाही. खाशाबा यांच्या भूमिकेसाठी हजारो इच्छुक कलाकारांमधून कठोर निवडप्रक्रियेनंतर एका नव्या चेहर्याची निवड करण्यात आली.त्यामुळे प्रेक्षकांची उत्सुकता ताणून धरली आहे.