मनोरंजन सृष्टीतून धक्कादायक बातमी समोर आली आहे. मीरारोडमध्ये एका टीव्ही अभिनेत्याने आपल्या घरी काम करणाऱ्या एका मोलकरणीची निर्घृण हत्या केली. धक्कादायक म्हणजे या अभिनेत्याने मोलकरणीकडे शरीर सुखाची मागणी केली होती. या हत्येनंतर घटनास्थळावरुन आरोपीने पळ काढला. मात्र पोलिसांनी त्याला विशाखापट्टणम येथून ताब्यात घेतले आहे.

मिळालेल्या माहितीनुसार, मृत महिला मुंबईतील काशीमिरा भागात वास्तव्यास होती. सिल्वर पार्क येथील चंद्रेश आर्केड इमारतीत काही दिवसांपासून घरकाम करत होती. बुधवारी सायंकाळी घरकाम करत असलेल्या घराच्या दरवाजात महिला गंभीर जखमी अवस्थेत शेजारी राहणाऱ्या महिलेला दिसली. त्यानंतर महिलेला खासगी रुग्णालयात उपचारासाठी दाखल करण्यात आलं. मात्र उपचारापूर्वी तिचा मृत्यू झाला असल्याचे समोर आले.

शवविच्छेदनात महिलेच्या गळ्यावर, छातीवर आणि पोटावर चाकूने वार केल्याचं आढळून आलं. घटनेनंतर आरोपीने पळ काढला. महिला ज्या घरात काम करत होती, ते घर टीव्ही अभेनेता आशिष मेश्राम असे आहे. याप्रकरणी माहिती मिळताच पोलिस घटनास्थळी दाखल झाले. पोलिसांनी दिलेल्या माहितीनुसार आरोपी अभिनेता सोसायटीमध्ये शिरताना आणि तिथून बाहेर पडताना अत्यंत घाईत असल्याचे दिसून आलं. दरम्यान पोलिसांनी तांत्रिक तपासाच्या आधारे माग काढत त्याला विशाखापट्टणम येथून अटक केल्याचा समोर आलं आहे.

टाइम्स ऑफ इंडियाने दिलेल्या माहितीनुसार, गेल्या अनेक दिवसांपासून अभिनेता आशिष महिलेकडे लैंगिक सुखाची मागणी करत होता. महिलेने वारंवार या मागणीला नकार दिला त्या नंतरही आरोपीने वारंवार तिचा छळ केला.

जानेवारी महिन्यात आरोपीने मृत महिलेच्या मुलाला फोन करून धमकी दिलेली. 'तुझ्या आईने माझ्याकडे काम करणं बंद केलं किंवा माझ्या मागण्या मान्य केला नाही तर तिला जीवे मारीन ' अशी धमकी दिल्यानंतर महिलेच्या मुलाने आशिषला गाठून मारण्याचा प्रयत्न केला होता. मात्र, आशिषच्या मोठ्या भावाने महिलेला विश्वासात घेऊन 'आशिष आता फ्लॅटवर राहत नाही', असे सांगितले. पुन्हा एकदा महिलेने विश्वास ठेवून त्या घरात कामाला जाण्यास सुरुवात केली होती. कामावर आल्याचे पाहून आरोपीने घरात प्रवेश केला आणि महिलेची हत्या केली.