महाराष्ट्र नवनिर्माण सेनेचे अध्यक्ष राज ठाकरे यांनी नुकतंच बॉलिवूडचा भाईजान सलमान खानशी भेट घेतली आहे. राज ठाकरे हे सलमानच्या मुंबईतील वांद्रे येथील गॅलेक्सी अपार्टमेंटमध्ये पोहचले आहेत. मिळालेल्या माहितीनुसार, येक नंबर या मराठी चित्रपटाच्या निमित्त ही भेट घेतली आहे. प्रमुख पाहुणे म्हणून आमंत्रित करण्यासाठी राज ठाकरे यांनी सलमान खान यांची भेट घेतली आहे.

२५ सप्टेंबरला येक नंबर या चित्रपटाचा ट्रेलर लाँचिंग सोहळा आहे. वांद्रेमधील ताज लँड्स एंड या हॉटेलमध्ये हा लाँचिंग सोहळा होणार आहे. या कार्यक्रमाला अभिनेता अमिर खान, दिग्दर्शक, राजकुमार हिरानी, आशुतोष गोवारीकर, निर्माता साजिद नाडियादवाला ही दिग्गज मंडळी उपस्थित राहणार आहे.

येक नंबर या चित्रपटाची घोषणा झाल्यापासून हा चित्रपट चर्चेत आहे. अलिकडेच चित्रपटाच्या शुटिंगवरील फोटो व्हायरल झाल्यानंतर चित्रपटाविषयीची चाहत्यांची उत्कुंठा वाढली. अलिकडेच येक नंबर या चित्रपटाचा टीझर आणि पोस्टर रिलीज झाला. ज्यामुळे चित्रपटात महाराष्ट्राच्या लाडक्या व्यक्तीमत्वाची मूख्य भूमिका असणार हे चित्र समोर आले. तेजस्विनी पंडित, वरदा साजिद नाडियाडवाला, बवेश जानवलेकर हे येक नंबर चित्रपटाची निर्मिती करत आहेत. येक नंबर हा चित्रपट १० ऑक्टोबरला चित्रपटगृहात प्रदर्शित होणार आहे.