मराठमोळी अभिनेत्री हर्षदा खानविलकर (Harshada Khanvilkar)आपल्या अभिनयाने चाहत्यांना वेड लावत आहे. सध्या तिची 'लक्ष्मी निवास' ही मालिका प्रेक्षकांचे भरपूर मोरंजन करत आहे. अलिकडेच या मालिकेचे 200 भाग पूर्ण झाले आहे. मालिकेचा प्रत्येक भाग मनोरंजनाने भरपूर असतो. मालिकेत हर्षदा खानविलकरने 'लक्ष्मी' हे आईचे पात्र साकारले आहे. सध्या मालिकांमध्ये सण साजरे होताना दिसत आहे. आता लवकरच गणपती देखील येणार आहेत. अशात नुकत्याच झालेल्या एका मिडिया मुलाखतीत हर्षदा खानविलकरने गणपती बाप्पाशी असलेले खास नाते सांगितले आहे.

एका मिडिया मुलाखतीत हर्षदाने गणपती बाप्पाशी असलेले आपले नात सांगताना म्हणाली की, "गणपती बाप्पांबद्दल काय सांगू? त्यांचे आणि माझे अनेक वर्षांपासून अफेअर आहे. गणपती बाप्पा फक्त श्रद्धा स्थान नसून माझं प्रेम आहेत. माझ्या वडिलांचे देखील गणपती बाप्पा प्रेम आहे. देवाची पूजा करताना एक भीती मनात बाळगली जाते. व्यवस्थित सगळं पाळलं जातं. पण माझे असे नाही. गणपती बाप्पा माझा मित्र आहे. सखा आहे. तो माझी नेहमी काळजी घेतो."

पुढे हर्षदा खानविलकर म्हणाली की, "मी माझ्या गणपती बाप्पाला वेगवेगळी नावे ठेवते. माझ्याकडे श्रीमंत दगडूशेठ हलवाईची प्रतिकृती आहे. मी त्याचे नाव शाहरुख (shah rukh khan) ठेवले आहे. कारण मला शाहरुख खान खूप आवडतो. माझे जास्त प्रेम शाहरुखवर आहे. तसेच सिद्धिविनायक गणपती प्राईम आणि प्रॉपर आहे. त्यामुळे त्याचे नाव आमिर खान असे ठेवले आहे. कारण तो परफेक्शनिस्ट आहे."

हर्षदा खानविलकरच्या शूटिंगवर मेकअप रुममध्ये भगवद् गीता, स्वामींचा फोटो आणि बाप्पाची मूर्ती तिने ठेवली आहे. तिच्या ड्रेसिंग टेबलवर श्रीमंत दगडूशेठ हलवाईची मूर्ती आहे.