मनोरंजन विश्वातून धक्कादायक बातमी समोर आली आहे. मराठी प्रसिद्ध अभिनेत्री आणि नृत्यांगणा भार्गवी चिरमुले यांच्या आईची फसवणूक करण्यात आली आहे. नेमकं घडलं काय, जाणून घेऊयात.

भार्गवी चिरमुलेच्या आईला एम एन जी एल गॅस कनेक्शन बिलाचा संदर्भाने व्हिडीओ कॉल आला. कॉलरच्या सांगितलेल्या कृतीतून पैशांची फसवणूक झाली. त्यानंतर भार्गवी चिरमुलेच्या आईचे ३५ हजार रुपये त्यांच्या बँकेतून सायबर चोरट्यांनी गायब केले. हा सगळा प्रकार मागील वर्षी ऑगस्ट महिन्यात झाला होता. याबाबत सायबर पोलिसात तक्रार केली होती. ही तक्रार वारजे पोलिस ठाण्यात वर्ग करण्यात आली.

वारजे पोलीस ठाण्यातील सायबर पथकाने तांत्रिक विश्लेषण करून, माहिती काढून फसवणूक करणाऱ्यांचे बँक खाते फ्रिज केले. त्यामधील फसवणूक झालेली रक्कम लिन केली. न्यायालयाची कायदेशीर कार्यवाही करून ही रक्कम तक्रारदारांना देण्यात आली. अभिनेत्री भार्गवी चिरमुले आणि त्यांच्या मातोश्री यांनी पोलीस ठाण्यात येऊन रक्कम स्वीकारली आणि पोलीसांचे आभार मानले.

भार्गवी चिरमुले मराठी इंडस्ट्रीतील खूप प्रसिद्ध चेहरा आहे. आजवर तिने अनेक मराठी मालिका, चित्रपट आणि नाटक यांमध्ये काम केले आहे. अलिकडेच तिचे 'एकदा पाहावं करून' हे नाटक प्रेक्षकांच्या भेटीला आले आहे. ती सोशल मीडियावर खूप सक्रिय असते. तिच्या नृत्यांने ती चाहत्यांना वेड लावले आहे.