Joseph Manu James Passes Away: केरळमधील सर्वात तरुण चित्रपट निर्माता जोसेफ मनू जेम्सचे २४ फेब्रुवारी रोजी एर्नाकुलम जिल्ह्यातील अलुवा येथील रुग्णालयात निधन झाले. 31 वर्षीय जोसेफची तब्येत बिघडल्याने त्याला राजागिरी रुग्णालयात दाखल करण्यात आले होते. जोसेफला न्यूमोनियाचे निदान झाल्याची माहिती मिळत आहे. जोसेफचा पहिला आगामी चित्रपट 'नॅन्सी रानी' लवकरच प्रदर्शित होणार होता. जेम्सच्या निधनाने मल्याळम चित्रपटसृष्टीत शोककळा पसरली आहे.

अहाना कृष्णा आणि अर्जुन अशोकन यांनी जोसेफ मनूच्या पहिल्या चित्रपटात काम केले होते. त्या चित्रपटाचे नाव 'नॅन्सी राणी'असे आहे. हा चित्रपट लवकरच चित्रपटगृहात प्रदर्शित होणार होता. त्याचवेळी जोसेफच्या मृत्यूमुळे खूप दु:ख झालेल्या अहानाने इंस्टाग्राम स्टोरीवर लिहिले की, "भावपूर्ण श्रद्धांजली मनू! हे तुझ्यासोबत घडायला नको होते."

जोसेफ मनूचा चित्रपट पोस्ट-प्रॉडक्शन टप्प्यात होता. या चित्रपटात अहाना कृष्णकुमार, अर्जुन अशोकन, अजू वर्गीस, श्रीनिवासन, इंद्रांस, सनी वेन, लीने, लाल आणि इतर सारखे ज्येष्ठ कलाकार देखील आहेत. शोक व्यक्त करताना अजूने जोसेफचा एक फोटो त्याच्या इंस्टाग्रामवर शेअर करत लिहिले की, "मित्रा फार लवकर सोडून गेलास."

जोसेफ मनूने 2004 मध्ये अभिनेता म्हणून आपल्या करिअरची सुरुवात केली होती. त्यावेळी त्याने साबू जेम्सच्या 'आय अॅम क्युरियस' या चित्रपटात लहान मुलाची भूमिका साकारली होती. पुढे त्याने आपल्या मेहनतीच्या जोरावर मल्याळम आणि कन्नड चित्रपटसृष्टीत आपले स्थान निर्माण करत सहाय्यक दिग्दर्शक म्हणून ओळख निर्माण केली. जेम्सवर रविवारी (२६ फेब्रुवारी) दुपारी ३ वाजता मेजर आर्चीपिस्कोपल मार्थ मरियम आर्कडेकॉन चर्च, कुरविलंगड येथे अंत्यसंस्कार करण्यात आले.