मनोरंजन विश्वातून धक्कादायक बातमी समोर आली आहे. मुंबईत एका महिलेने तक्रार दाखल केल्यानंतर 'महाभारत' मालिकेतील प्रसिद्ध अभिनेता आणि कुस्तीपटू सौरव गुर्जर (Saurav Gurjar) याला न्यायालयीन कोठडी सुनावण्यात आली आहे. लग्नाचे आश्वासन देऊन फसवणूक केल्याचा आणि छळ केल्याचा आरोप महिलेने केला आहे. गचीबोवली पोलिसांनी याप्रकरणी गुन्हा दाखल केला असून तपास सुरू आहे.

'इंडिया टुडे'च्या वृत्तानुसार, तक्रारीत नमूद केल्याप्रमाणे, २०२१ मध्ये इन्स्टाग्रामच्या माध्यमातून या महिलेची सौरव गुर्जरशी ओळख झाली आणि त्यानंतर व्हॉट्सॲपवर त्यांच्यातील जवळीक वाढली. २५ डिसेंबर २०२१ रोजी ते पहिल्यांदा प्रत्यक्ष भेटले आणि त्याने तिला लग्नाचे तसेच पत्नीचा दर्जा देण्याचे आश्वासन दिले, असा आरोप महिलेने केला आहे. ती अमेरिकेत असताना आणि भारतात परतल्यानंतरही ते एकत्र राहत होते. आपण दोघे मिळून व्यवसाय करू, असे आश्वासन देऊन त्याने तिला अमेरिकेतील नोकरी सोडण्यास प्रवृत्त केले होते, असा दावा तिने केला.

महिलेने आरोप केला की, अभिनेत्याच्या वागणुकीमुळे तिला तिच्या करिअरवर लक्ष केंद्रित करणे कठीण झाले होते. जेव्हा जेव्हा ती त्याला लग्नाबद्दल विचारायची, तेव्हा तो तिचा नंबर ब्लॉक करायचा आणि तिच्यापासून दूर राहायचा. सौरव गुर्जर ऑक्टोबर २०२५ ते मार्च २०२६ या काळात तिच्यासोबत राहिला होता, असा दावाही महिलेने केले आहे.हैदराबादमध्ये एकत्र राहिल्यानंतर, त्याने तिला काहीही न सांगता अचानक तिथून निघून गेला.

तक्रारीच्या आधारे गचीबोवली पोलिसांनी गुन्हा दाखल करून तपास सुरू केला. पोलिसांनी सौरव गुर्जरला मुंबई विमानतळावरून ताब्यात घेतले आणि पुढील कायदेशीर कार्यवाहीसाठी त्याला हैदराबादला आणले. त्यानंतर त्याला न्यायालयीन कोठडी सुनावण्यात आली आहे. हे आरोप अद्याप न्यायालयात सिद्ध झालेले नाही. पोलीस तपास सुरू आहे.

सौरव गुर्जरची कारकीर्द

सौरव गुर्जरने २०१३ मध्ये टेलिव्हिजनवर आपल्या अभिनय कारकिर्दीची सुरुवात केली. स्टार प्लसवरील 'महाभारत' या मालिकेतून त्याने पदार्पण केले, ज्यात त्याने 'भीम'ची भूमिका साकारली होती. ही मालिका २०१३ ते २०१४ या काळात प्रसारित झाली. त्यानंतर २०१६ ते २०१७ दरम्यान 'संकटमोचन महाबली हनुमान' या मालिकेत त्याने रावण आणि बाली यांच्या भूमिका साकारल्या. २०२२ मध्ये 'ब्रह्मास्त्र' या चित्रपटातून त्याने चित्रपटसृष्टीत पदार्पण केले.