Thane News: मुंबईत आज सर्वत्र मुसळधार पावसाच्या सरी कोसळत आहेत. जागोजागी पाणी साचले आहे. तर अनेक ठिकाणी दरड कोसळण्याच्या घटना देखील घडल्या आहेत. अशात दिवंगत अभिनेत्री नूतन यांच्या बंगल्याचा काही भाग कोसळल्याची घटना घडलीये. सुदैवाने या घटनेत कोणतीही जीवितहानी झालेली नाही. (Latest Thane News)

मिळालेल्या अधिक माहितीनुसार, ठाण्यातील (Thane) मुंब्रा रेतीबंदर या ठिकाणी ही घटना घडली आहे. सदर परिसरात दिवंगत अभिनेत्री नुतन यांचा बंगला आहे. हा बंगला फार जूना असल्याने आता तो बराचरसा जिर्न झालाय. त्यामुळे आज कोसळत असलेल्या पावसात या बंगल्याचा काही भाग खाली कोसळला आहे.

सदर घटना २७ जून रोजी सायंकाळी ६ वाजण्याच्या सुमारस घडली आहे. घटनेची माहिती मिळताच आपत्ती व्यवस्थापन कक्ष एका वाहनासह घटनास्थळी दाखल झाले. त्यानंतर त्यांनी या भागाची पाहणी केली आणि सार्वजनिक बांधकाम विभागाला याची माहिती दिली आहे.

नूतन यांची अनेक गाणी आणि चित्रपट (Movie) चाहते आजही आवडीने पाहतात. एवढ्या जुण्या काळातील हा बंगला असल्याने गेल्या अनेक वर्षांपासून तो पडीक होता. मात्र तो नूतन यांचा बंगला आहे त्यामुळे नागरिकांसाठी तो आकर्षणाचा केंद्र आहे. त्यामुळे हा बंगला पाडण्यात आला नव्हता. मात्र आज पावसाचा जोर असल्याने त्यांच्या बंगल्याचा बराच मोठा भाग कोसळल्याची घटना घडली आहे.