KEM Hospital On Sejal Pawar Viral Video: स्टँडअप कॉमेडियन प्रणित मोरेच्या शोमधील एका व्हायरल व्हिडिओमुळे नव्या वादाला तोंड फुटले आहे. ‘370 रुपयांची बिर्याणी’ या वक्तव्यामुळे आधीच चर्चेत आलेल्या या शोमधील आणखी एका क्लिपने सोशल मीडियावर संतापाची लाट उसळली आहे. या व्हिडिओमध्ये KEM रुग्णालयातील एमबीबीएसची विद्यार्थिनी डॉ. सेजल पवार हिने मृतदेहाच्या प्रायव्हेट पार्टबद्दल केलेल्या आक्षेपार्ह आणि अश्लील वक्तव्यावरून ती सध्या ट्रोलिंगचा सामना करत आहे.

या प्रकरणाची गंभीर दखल घेत KEM रुग्णालय प्रशासनाने चौकशीचे आदेश दिले आहेत. रुग्णालयाने वरिष्ठ डॉक्टरांची समिती स्थापन करून संपूर्ण घटनेची सखोल चौकशी सुरू केली आहे. चौकशी अहवाल प्राप्त झाल्यानंतर पुढील कारवाई केली जाईल, असे रुग्णालय प्रशासनाने स्पष्ट केले आहे.

KEM रुग्णालयाचे अधिष्ठाता (डीन) डॉ. हरिश पाठक यांनी या प्रकरणावर प्रतिक्रिया देताना सांगितले की, सोशल मीडियावर व्हायरल होत असलेल्या क्लिपची माहिती मिळाल्यानंतर रुग्णालयाने तातडीने पावले उचलली आहेत. मृतदेहांबाबत करण्यात आलेली टिप्पणी अत्यंत आक्षेपार्ह असून रुग्णालय प्रशासन या विषयाकडे अत्यंत संवेदनशीलतेने पाहत आहे. त्यामुळे संपूर्ण कार्यक्रमाचा व्हिडिओ तपासण्यासाठी चौकशी समिती नेमण्यात आली आहे.

या समितीत पदवीपूर्व वसतिगृहाच्या वॉर्डन आणि बायोकेमिस्ट्री विभागाच्या प्रमुख डॉ. अनिता चालक यांचा समावेश आहे. तसेच मेडिसीन विभागातील सहाय्यक प्राध्यापिका डॉ. श्रद्धा मोरे यांनाही समितीत स्थान देण्यात आले आहे. डॉ. मोरे या KEM रुग्णालयाच्या सोशल मीडिया व्यवस्थापनाची जबाबदारीही सांभाळतात.

सूत्रांच्या माहितीनुसार, समितीने संबंधित कार्यक्रमाचे संपूर्ण रेकॉर्डिंग तपासण्यास सुरुवात केली आहे. व्हायरल झालेली दोन मिनिटांची क्लिप या कार्यक्रमातीलच एक भाग असल्याचे सांगितले जात आहे. चौकशीदरम्यान डॉ. सेजल पवारचे स्पष्टीकरणही नोंदवले जाणार आहे.