मुंबई: बॉलिवूडचे कपल अजय देवगण(Ajay Devgan) आणि काजोल(Kajol) यांची मुलगी न्यासा देवगणने बॉलिवूडमध्ये अजून पदार्पण केले नसले, तरी तिचे अनेक चाहते आहेत. जे नेहमी तिला सोशल मीडियावर फॉलो करत असतात. न्यासाचे फोटो आणि व्हिडिओ सोशल मीडियावर येताच व्हायरल होतात. न्यासाचे सोशल मीडियावर अधिकृत खाते नसले तरी तिचे मित्र आणि चाहते तिचे फोटो आणि व्हिडिओ शेअर करत असतात. नुकत्याच झालेल्या एका मुलाखतीत काजोलने तिच्या मुलीच्या बॉलिवूड पदार्पणाबद्दल स्पष्ट मत मांडले आहे. तिची दोन्ही मुले, जे काही करतील त्यात ती त्यांच्या सोबत असेल, असे काजोल म्हणाली.

एका मुलाखतीवेळी काजोल म्हणाली, 'पुढे काय करायचे, कोणते क्षेत्र निवडायचे हा माझ्या मुलांचा प्रश्न आहे, मला वाटते की त्यांना काहीही करायचे असेल, मी त्यांना नेहमी पाठिंबा देईन. मला वाटते की आई म्हणून माझे सर्वात मोठे काम तिला फिल्म इंडस्ट्रीमध्ये मार्गदर्शन करणे नाही, तर तिला ज्या कामातून आनंद मिळतो ते काम करण्यासाठी तिला तयार करणे हे आहे'.

'मला वाटते की न्यासा ही अशी मुलगी आहे जी स्वतःचा निर्णय स्वतः घेऊ शकते. मी तिला इंडस्ट्रीपासून दूर ढकलत नाही किंवा मी तिला माझ्यासारखी अभिनेत्री व्हायचेही सांगत नाही. ती स्वतः ठरवेल तिला काय करायचं. ती १८ वर्षांची एक सूजाण मुलगी आहे', असे देखील काजोलने सांगितले.

न्यासा देवगन हल्लीच तिच्या मित्रांसोबत व्हॅकेशनसाठी परदेशी गेली होती. तिच्या मित्रांनी तिच्या या व्हेकेशन ट्रिपचे फोटो आणि व्हिडिओ सोशल मीडियावर शेअर केले आहेत. अलीकडेच तिचा एक व्हिडिओ सोशल मीडियावर तुफान व्हायरल झाला होता, ज्यामध्ये ती मित्रांसोबत पार्टी करताना आणि तिचे नृत्य कौशल्य दाखवताना दिसली होती.