रहस्य, पौराणिक कथा आणि गुप्त खजिन्याचा शोध हा सर्व थरार तुम्हाला 'इंद्रजाल' या चित्रपटात पाहायला मिळणार आहे. 'इंद्रजाल' चित्रपटाचा पहिला लूक पोस्टर नुकताच रिलीज करण्यात आला आहे. भारताचा समृद्ध इतिहास आणि संस्कृतीशी जोडलेला 'इंद्रजाल' चित्रपट भारतीय पौराणिक कथांमधील निळावंतीशी संबंधित गूढ रहस्य आणि जंगलातील रोमांचक साहसावर आधारित आहे.

'शिवरत्न प्रॉडक्शन'ने नुकतीच 'इंद्रजाल' या त्यांच्या पहिल्या हिंदी चित्रपटाची घोषणा केली आहे. आता या चित्रपटाचे पहिले मोशन पोस्टर आणि फर्स्ट लूक समोर आला आहे, जे पाहून प्रेक्षक चित्रपट पाहण्यासाठी उत्सुक आहेत.

'इंद्रजाल' हा सिनेमा सौ. सुचेता अजय निकम यांच्या 'शिवरत्न प्रॉडक्शन'ची पहिली निर्मिती आहे. तसेच अजय निकम आणि मंगेश वैती हे या चित्रपटाचे सहनिर्माते आहेत. चित्रपटाच्या दिग्दर्शनाची धुरा दिग्दर्शक जागेश्वर ललिता ढोबळे यांनी सांभाळली आहे. जमिनीशी जोडलेले, भावपूर्ण आणि सामाजिक दृष्ट्या महत्त्वपूर्ण कथा मांडण्यासाठी ओळखले जाणारे हे दिग्दर्शक 'इंद्रजाल'मधून हिंदी चित्रपटसृष्टीत पदार्पण करत आहेत.

'इंद्रजाल' स्टार कास्ट

'इंद्रजाल' चित्रपटात मुख्य भूमिकेत महेश निकम, शनाया त्रिपाठी, यशराज डिंबळे, किरण माने, कल्पना सारंग, नामदेव मुरकुटे हे कलाकार झळकले आहेत. तर दर्शना रसाळ, धीरज शर्मा, सत्यम छेत्री, राहुल कुलकर्णी, संजना देशमुख, कल्पेश जगताप, लक्ष्मी विभुते आणि योगेश दांगट हे सह कलाकार आहेत. 'इंद्रजाल' हा रहस्यमय चित्रपट 24 जुलैला रिलीज होणार आहे. चाहते चित्रपटाच्या ट्रेलरसाठी उत्सुक आहेत.