लावणी क्वीन गौतमी पाटील पुन्हा एकदा आपल्या डान्समुळे चर्चेत आली आहे. गौतमी पाटील आता प्रसिद्ध मराठी अभिनेते भाऊ कदम यांच्यासोबत झळकली आहे. दोघांचं नवीन गाणे प्रेक्षकांच्या भेटीला आले आहे. या गाण्यावर भाऊ कदम यांच्या मुलीने म्हणजेच मृण्मयी कदम हिने खास कमेंट करून आपल्या वडिलांचे भरभरून कौतुक केले आहे.

भाऊ कदम - गौतमी पाटील सुपरहिट जोडी

पहिल्यांदाच भाऊ कदम आणि गौतमी पाटीलही सुपरहिट जोडी प्रेक्षकांच्या भेटीला आली आहे. नुकतेच यांचे 'हिल हिल पोरी हिला…' हे गाणे प्रदर्शित झाले आहे. या गाण्याला चाहत्यांकडून भरपूर प्रेम मिळत आहे. हे गाणे दादा कोंडके यांच्या 'हिल हिल पोरी हिला...' या गाण्याचा सुंदर रिमेक व्हर्जन आहे. हे गाणे दादा कोंडके यांच्या 'आंधळा मारतो डोळा' या चित्रपटातील आहे. 'हिल हिल पोरी हिला...' हे गाणे गायक रोहित राऊत आणि गायिका सोनाली सोनावणे यांनी आपल्या सुरेल आवाजात संगीतबद्ध केले आहे.

भाऊ कदम यांच्या लेकीची कमेंट

भाऊ कदम यांची लेक परदेशात शिकत असून जॉबही करत आहे. तिने गाण्याच्या व्हिडीओवर खूपच खास कमेंट केली आहे. तिने लिहिले की, "गाणं खूप आवडलं...एकदम मस्त! या गाण्यावर कधी डान्स करतेय असं झालंय..."

भाऊ कदम - गौतमी पाटील दोघेही 'हिल हिल पोरी हिला...' गाण्यात खूपच सुंदर आणि हटके लूकमध्ये दिसत आहेत. एका लूकमध्ये गौतमीने लाल रंगाची सुंदर नऊवारी साडी नेसली आहे आणि भाऊ कदमने दादा कोंडके स्टाइल लूक केला आहे. डान्समध्ये दोघांचीही भन्नाट केमिस्ट्री पाहायला मिळत आहे. सध्या सोशल मीडियावर हे गाणे तुफान व्हायरल होताना दिसत आहे. या गाण्यावर चाहते आणि कलाकार मंडळी कमेंट्सचा आणि प्रेमाचा वर्षाव करत आहेत.