प्रेक्षकांच्या भेटीला नवीकोरी मालिका येणार आहे. मालिकेचा खास प्रोमो समोर आला आहे. मालिकेत खूपच तगडी स्टार कास्ट पाहायला मिळत आहे. नवीन मालिका 'कलर्स मराठी' वाहिनीवर सुरू होणार आहे. मालिकेच्या पहिल्याच प्रोमोने प्रेक्षकांचे लक्ष वेधून घेतले आहे. 'कलर्स मराठी'चा टीआरपी आधीच 'बिग बॉस मराठी 6' मुळे उंचावला आहे. आता ही मालिका त्यात भर घालणार असल्याचे दिसत आहे.

'कलर्स मराठी' वाहिनीवर सुरू होणाऱ्या मालिकेच नाव 'मी जिंकून घेईन सारं!' असे आहे. मालिकेच्या प्रोमोमध्ये कलाकारांची झलक पाहायला मिळत आहे. या मालिकेत मराठी अभिनेत्री जान्हवी तांबट मुख्य भूमिकेत दिसणार आहे. मालिकेतील तिच्या पात्राचे नाव छवी आहे. ज्येष्ठ अभिनेत्री भारती आचरेकर मालिकेत महत्त्वाच्या भूमिका साकारणार आहे. मालिकेत भारती आचरेकर या आजीच्या भूमिकेत दिसणार आहे.तसेच मालिकेत दोन हिरो पाहायला मिळणार आहेत. एक अभिनेता अमित रेखी आणि दुसरा संचित चौधरी... अभिनेत्री अमृता फडके ही खलनायिकेच्या रुपात पाहायला मिळणार आहे.

मालिकेच्या प्रोमोमध्ये तुम्ही पाहू शकता की, छवी आपल्या आजीला बोलते की, "तुझी सावली तुझ्यासोबत आहे..." त्यामुळे मालिकेत आजी-नातीची हटके जोडी पाहायला मिळणार आहे. व्हिडीओच्या प्रोमोला कॅप्शन लिहिलं की, "कितीही येऊ दे अडचणींचं वारं, छवी नेहमीच म्हणते 'मी जिंकून घेईन सारं'!" या व्हिडीओवर नेटकरी कमेंट्सचा वर्षाव करत आहे.

यापूर्वी जान्हवी तांबटने 'लक्ष्मी निवास', 'अबोल प्रितीची अजब कहाणी' या मालिकेत काम केले आहे.अमित रेखीने 'भाग्य दिले तू मला' या मालिकेत काम केले आहे. तर 'तुझी माझी जमली जोडी' या मालिकेत संचित चौधरी झळकलेला. अमृता याआधी 'प्रेमास रंग यावे' मालिकेत झळकली होती. प्रोमोमुळे प्रेक्षक मालिका पाहण्यासाठी उत्सुक झाले आहेत. मात्र अद्याप मालिकेची रिलीज डेट आणि वेळ जाहीर झाली नाही.