कार्तिक आर्यनच्या 'चंदु चॅम्पियन'ची चाहत्यांमध्ये प्रचंड क्रेझ आहे. ह्या चित्रपटात भारताला पॅराऑलिम्पिकमध्ये गोल्ड मेडल मिळवून देणाऱ्या मुरलीकांत पेटकर यांचे कथानक आहे. मुरलीकांत पेटकर यांचे पात्र चित्रपटामध्ये बॉलिवूड अभिनेता कार्तिक आर्यन साकारत आहे. या चित्रपटामध्ये प्रमुख भूमिकेत बॉलिवूड सेलिब्रिटींसोबत काही मराठी सेलिब्रिटीही आहेत. हेमांगी कवीसोबत चित्रपटात अभिनेता श्रेयस तळपदेही दिसणार आहे. मुरलीकांत पेटकर यांच्या बायोपिकमध्ये श्रेयसने पोलिस इन्स्पेक्टरची भुमिका साकारली आहे.

श्रेयस तळपदेने इन्स्टाग्रामवर रिल शेअर करत चाहत्यांना गुड न्यूज दिली आहे. अभिनेत्याची चित्रपटामध्ये फार छोटी भूमिका आहे. श्रेयस तळपदेने इन्स्टाग्राम पोस्टमध्ये लिहिलंय की, "नुकत्याच प्रदर्शित झालेल्या मुरलीकांत पेठकर यांच्या 'चंदु चॅम्पियन' या बायोपिकमध्ये मला पोलिस इन्स्पेक्टर सचिन कांबळेंची भूमिका साकारण्याचा मोठा मान मिळाला आहे. ज्यावेळी कबीर भाईंनी (दिग्दर्शक कबीर खान) मला चित्रपटाचं कथानक सांगितलं, तेव्हा सुरुवातीला मला आश्चर्य वाटलं की, आपल्या महाराष्ट्रातील अनेकांना या खऱ्या आयुष्यातील चॅम्पियनविषयी माहिती नाही. मला पोलिस इन्स्पेक्टर सचिन कांबळे यांची भूमिका दिल्याबद्दल दिग्दर्शक कबीर भाईंचे मनापासून आभार."

"माझा या भूमिकेसाठी विचार केल्याबद्दल कास्टिंग डायरेक्टर यांचेही मनापासून आभार. अनेकदा माझ्या मनात विचार यायचं की, तू माझा या भूमिकेसाठी का विचार केला असेल ? पण, तू योग्य निर्णय घेतलास. त्यासाठी तुझे आभार आय लव्ह यू डार्लिंग. कार्तिक आर्यनविषयी सांगायचं तर, तू खरा चॅम्पियन आहेस. तू खूप खरेपणाने ‘चंदू’ची भूमिका साकारली आहेस. बायोपिकमध्ये काम करणं हे खूप कठीण असतं. बायोपिकमध्ये काम करताना त्या पात्राप्रमाणे काम करण्यासाठी विशेष मेहनत घ्यावी लागते. तू चित्रपटामध्ये जीव ओतून काम केलं आहेस. ‘चंदू चॅम्पियन’ चित्रपट आणि तुझे येणारे सर्व चित्रपट ब्लॉकबस्टर ठरोत हीच शुभेच्छा! ‘चंदू चॅम्पियन’ तुमच्या जवळच्या चित्रपटगृहात प्रदर्शित झाला आहे. नक्की पाहा…ही सुंदर कलाकृती पाहणं चुकवू नका" अशी पोस्ट श्रेयस तळपदेने शेअर केली आहे.