बॉलिवूडचा मिस्टर परफेक्शनिस्ट आमिर खान याने आपल्या दमदार अभिनयाच्या जोरावर चाहतावर्ग तयार केला आहे. गेल्या अनेक दिवसांपासून तो फिल्म इंडस्ट्रीपासून दुर आहे. नुकताच आमिरने मुंबईमध्ये अलिशान घर खरेदी केलं आहे. स्क्वेअर यार्ड्स डॉट कॉमनुसार, मुंबईच्या पाली हिल भागात अभिनेत्याने ९. ७५ कोटींचं अपार्टमेंट खरेदी केलं आहे. हे नवीन खरेदी केलेलं घर आमिरच्या नावावर आहे.

हिंदुस्थान टाईम्सच्या माहितीनुसार, आमिर खानचं नवीन घर तयार आहे, तो ह्या घरात केव्हाही राहायला येऊ शकतो. अभिनेत्याने खरेदी केलेला फ्लॅट १०२७ स्क्वेअर फूट इतका आहे. २५ जून रोजी अभिनेत्याने या नव्या घराचे रजिस्ट्रेशन केले आहे. या घरासाठी आमिरने ५८. ५ लाखांची स्टॅम्प ड्युटी भरली आहे. तर ३० हजार रुपये रजिस्ट्रेशन फी भरली आहे. आमिरने नवीन खरेदी केलेलं घर, पालीमधील बेला विस्टा अपार्टमेंट या बिल्डिंगमध्ये त्याने हा फ्लॅट खरेदी केल्याची माहिती आहे. याशिवाय, आमिरचा पालीमधील मरीना अपार्टमेंटमध्येही फ्लॅट आहे.

आमिरचा मुंबईतील वांद्रे येथे दोन मजली सी फेसिंग फ्लॅट आहे. त्याचा तो फ्लॅट ५ हजार स्क्वेअर फूट जागेवर आहे. याशिवाय आमिरचा पंचगणीमध्ये देखील फार्महाऊस आहे. २०१३मध्ये त्यांनी ७ कोटींना हा फार्महाऊस खरेदी केला होता. त्याचा हा फार्महाऊस २ एकर परिसरात पसरलेला आहे. मीडिया रिपोर्टनुसार, आमिरची उत्तर प्रदेशातही प्रॉपर्टी आहे. उत्तर प्रदेशमध्ये आमिरच्या नावावर जवळपास २२ घर आहेत.

५९ वर्षीय आमिर खानचे वडील ताहीर हुसैन खान प्रसिद्ध चित्रपट निर्माते होते. आमिरने आपल्या सिनेकरियरची सुरुवात बालकलाकार म्हणून केली होती. आमिर खान एक प्रसिद्ध अभिनेता असून तो लेखक आणि निर्माताही आहे. आमिरने २००१ मध्ये, "आमिर खान प्रॉडक्शन्स" नावाचं प्रॉडक्शन हाऊस सुरू केले होते. काही मिडिया रिपोर्टनुसार, मार्च २०२४ पर्यंत अभिनेत्याची एकूण संपत्ती जवळपास १ हजार ८६२ कोटींच्या घरात आहे.