बॉलिवूडचे महानायक म्हणून अमिताभ बच्चन यांना ओळखले जाते. अमिताभ बच्चन नेहमीच आपल्या अभिनयामुळे चर्चेत असतात. परंतु आता ते एका वेगळ्याच कारणामुळे चर्चेत आले आहे. अमिताभ बच्चन यांनी मुंबईत ३ ऑफिस खरेदी केले आहे. या प्रॉपर्टीची किंमत जवळपास ६० कोटी रुपये आहे.

मुंबईतील अंधेरी वीरा देसाई रोडवरील वीर सावरकर सिग्नेचर बिल्डिंगमध्ये त्यांनी ही प्रॉपर्टी खरेदी केली आहे. बिग बी यांनी ६० कोटी रुपयांची मालमत्ता खरेदी केल्याने ते चर्चेत आले आहे.

Floortap.com ने दिलेल्या माहितीनुसार, अमिताभ बच्चन यांनी तीन ऑफिससाठी ५९.५८ कोटी रुपये दिले आहेत. या ऑफिसचे एकूण क्षेत्रफळ ८.४२९ स्क्वेअर फूट आहे.

मिळालेल्या माहितीनुसार, अमिताभ बच्चन यांनी २० जून २०२४ रोजी ही मालमत्ता खरेदी केली आहे. अमिताभ बच्चन यांनी या ऑफिससाठी जवळपास ३.५७ कोटी रुपयांची स्टॅम्प ड्यूटी भरली असल्याचे सांगण्यात येत आहे. अमिताभ बच्चन यांनी खरेदी केलेले तिन्ही ऑफिस खूप मोठे आणि प्रशस्त आहेत.

अमिताभ बच्चन यांनी याबाबत कोणतीही अधिकृत माहिती दिली नाही. मिळालेल्या माहितीनुसार, याच बिल्डिंगमध्ये अमिताभ बच्चन यांचे अजून चार ऑफिस आहेत. त्यांनी २०२३ मध्ये हे ऑफिस खरेदी केले होते. त्यानंतर आता अजून ३ ऑफिस खरेदी केल्याने आता एकाच बिल्डिंगमध्ये अमिताभ बच्चन यांचे एकूण सात ऑफिस आहेत.

अमिताभ बच्चन यांच्या वर्कफ्रंटबद्दल बोलायचे झाले तर, बिग बी लवकरच 'कल्की २८९८ एडी' या चित्रपटातून प्रेक्षकांच्या भेटीला येणार आहे. या चित्रपटाचा ट्रेलर लाँच झाला आहे. चित्रपटाच्या ट्रेलरला प्रेक्षकांनी चांगलीच पसंती दर्शवली आहे.