'द परफेक्शनिस्ट' आमिर खान (Aamir Khan) नेहमी कोणत्या ना कोणत्या कारणामुळे चर्चेत असतो. अलिकडेच तो आपल्या वैयक्तिक आयुष्यामुळे चांगलाच चर्चेत आला होता. त्याने आपल्या वाढदिवसाला गर्लफ्रेंडची ओळख चाहत्यांना करून दिली होती. आमिर खान यांनी आजवर अनेक हिट चित्रपट केले आहेत. त्याच्या अभिनयाने चाहत्यांना वेड लावले आहे. चाहते आता आमिरच्या नवीन प्रोजेक्टची आतुरतेने वाट पाहत आहेत.

अशात आता आमिर खान एका मोठ्या प्रोजेक्टमधून चाहत्यांच्या भेटीला येणार आहे. याचा खुलासा एका मिडिया मुलाखतीत आमिर खानने केला आहे. आमिर खानने मुलाखतीत सांगितले की, "मी आता लवकरच 'महाभारत' चित्रपटाचं काम सुरू करणार आहे. या चित्रपटाची निर्मिती मी करणार आहे. "

'महाभारत' (Mahabharat Movie ) चित्रपटाबाबत अधिक बोलताना आमिर खान म्हणाला, "'महाभारत' चित्रपटाचे 'लॉर्ड ऑफ द रिंग्ज' या हॉलिवूड सीरिजप्रमाणे अनेक भाग बनविण्यात येतील. मात्र या चित्रपटाचे लिखाण करण्याच खूप वेळ लागणार आहे. चित्रपटात मी कोणती भूमिका करेन की नाही हे मला आता माहित नाही. कारण याची पूर्ण जबाबदारी कास्टिंग टीमची असेल. ते भूमिकांसाठी योग्य निवड करतील"

पुढे 'महाभारत'चित्रपटाच्या भागांविषयी सांगताना आमिर खान म्हणाला की, "'महाभारत' एका भागातून सांगण्यासारखी गोष्ट नाही. त्यामुळे चित्रपटाचे काही भाग करण्याचा विचार आम्ही करत आहोत. यात मी इतर दिग्दर्शकांचा सल्ला देखील घेणार आहे."

'महाभारत' हा चित्रपट कधी प्रेक्षकांच्या भेटीला येणार याबाबत अद्याप कोणताही खुलासा करण्यात आला नाही आहे. मात्र आमिर खानचे चाहते चित्रपटासाठी उत्सुक आहेत. आमिर खान आता 'सितारे जमीन पर' चित्रपटातून प्रेक्षकांच्या भेटीला येणार आहे. हा चित्रपट 25 डिसेंबरला रिलीज होणार आहे.