बिग बॉसच्या घरात 11 वा आठवडा सुरू आहे. बिग बॉस आता शेवटच्या टप्प्यावर आले आहे. या आठवड्यात घरात डबल एलिमिनेशन होणार आहे. डबल एलिमिनेशनमध्ये काल भाऊच्या धक्क्यावर प्रभू शेळकेने घराचा निरोप घेतला. प्रभूच्या एक्झिटने तन्वीला खूप वाईट वाटले. तन्वी आणि घरातील इतर सदस्य देखील खूप भावुक झाले. या आठवड्यात घराबाहेर जाण्यासाठी एकूण सात सदस्य नॉमिनेट झाले होते.

नॉमिनेट झालेले सदस्य

• दिपाली सय्यद

• प्रभू शेळके

• राकेश बापट

• रेवा कौरासे

• अनुश्री माने

• सागर कारंडे

• संकेत पाठक

शेवटी Danger झोनमध्ये रेवा कौरासे आणि प्रभू शेळके उरतात. त्यातून प्रभू एलिमिनेट होतो. प्रभू शेळकेने बिग बॉसच्या घराबाहेर आल्यावर प्रेक्षकांचे आभार मानले. तो म्हणाला की, "महाराष्ट्राने इतके प्रेम केले, पाठिंबा दिला त्याबद्दल त्यांचे खूप मनापासून आभार...स्वप्न होत की ट्रॉफी घरी घेऊन जायचे, पण ते पूर्ण झाले नाही. मी येथे आलो माझ्या फॅमिलीचे एक स्वप्न पूर्ण केले हे माझ्यासाठी खूप मोठी गोष्ट आहे..."

प्रभू शेळके कोण?

प्रभू शेळके हा जालना जिल्ह्यातील परतूर तालुक्यातील वलखेड या छोट्याशा गावातील राहणारा मुलगा. तो सोशल मीडियावर 'काळू डॉन' म्हणून लोकप्रिय आहे. प्रभू शेळके प्रसिद्ध रील स्टार आहे. आपल्या कॉमेडी आणि अभिनय शैलीने तो लोकांचे भरपूर मनोरंजन करतो. प्रभू शेळके यांनी बिग बॉसच्या घरात सांगितले की, दर महिन्याला माझे रक्त बदलावे लागते. रक्त बदलण्यासाठी तीन तास लागतात. उपचारांसाठी आईवडिलांनी वावर विकले. प्रभू शेळकेला गेल्या आठ वर्षांपासून 'थॅलेसेमिया' हा आजार आहे. "या आजारात शरीरातील रक्तपेशी नष्ट होत असतात, त्यामुळे दर महिन्याला मला रक्त बदलावे लागते... " असे प्रभू म्हणाला. बिग बॉस मराठी ६'च्या घरात एन्ट्री करताना त्याने शॉर्टकटचा मार्ग न निवडता मेहनतीचा मार्ग निवडला.

आता प्रभू शेळके नंतर बिग डबल एलिमिनेशनमध्ये बिग बॉसच्या घरातून कोणाचा पत्ता कट होणार, हे पाहणे महत्त्वाचे ठरणार आहे. सोशल मीडियावर संकेत पाठकच्या नावाची चर्चा सुरू आहे. मात्र अद्याप कोणतीही अधिकृत घोषणा झाली नाही. याचा खुलासा आता आज रितेश भाऊ भाऊच्या धक्क्यावर करतील. 'बिग बॉस मराठी ६' हा शो रात्री 8 वाजता 'कलर्स मराठी' आणि 'जिओहॉटस्टार'वर पाहायला मिळतो.