गणेशोत्सवनिमित्त सर्वत्र आनंदाचे वातावरण आहे. लाडक्या गणरायाचं आगमन सर्वत्र मोठ्या थाटामाटात झालं. अनेक सेलिब्रिटीसह घरोघरी बाप्पाचं स्वागत करण्यात आलं. अशातच सोशल मीडियावर इरिनाचा डान्स व्हिडीओ व्हायरल झाला आहे. गणपती बाप्पाच्या मिरवणुकीत इरिनाने ठेका धरला आहे.

इरिनाने पुण्यातील श्रीमंत भाऊसाहेब रंगारी गणपतीचं दर्शन घेतलं. यावेळी बाप्पाच्या मिरवणुकीत इरिनाने मराठमोळ्या अंदाजात डान्स केला आहे. अत्यंत मनमोहक सौंदर्यासह इरिनाच्या डान्स स्टेप्सने लक्ष वेधून घेतले आहे. पारंपारिक लूकमध्ये इरिनाने खास साडी परिधान केली आहे. साडीवर गोल्डन ज्वेलरी परिधान करत इरिनाने केसांची स्टाईल केली आहे.

सोशल मीडियावर इरिनाच्या डान्सचं सर्वत्र कौतुक होत आहे. नेटकऱ्यांनी प्रतिक्रिया देत,'खरं तर इरिना महाराष्ट्रात जन्माला यायला पाहिजे होती, चुकून रशियाला गेली' असं म्हटलं आहे. तर आणखी एकाने, 'बाहेरच्या देशातील असूनही भारतीय देशातील संस्कृती तू जपतेस खरंच तुला मानले...' 'अगंभर कपडे, ही आपली संस्कृती. वा छान वाटलं' अश्या प्रतिक्रिया दिल्या आहेत.

कोण आहे इरिना?

इरिना ही बिग बॉस मराठी स्पर्धक आहे. सध्या बिग बॉस मराठी ५ चा सातवा आठवडा सुरू आहे. यामध्ये अभिनेत्री, इनफ्ल्युएंसर, ब्लॉगर, कंटेन्टर आणि परदेशी गर्ल इरिनाचा सहभाग आहे. यातील काही स्पर्धक घराबाहेर गेले आहेत. यात इरिनाचा देखील समावेश आहे. घराबाहेर आल्यानंतर देखील इरिनाने प्रेक्षकांची मने जिंकली आहेत. मूळची रशियन इरिनाचं मराठी संस्कृतीवर विशेष प्रेम आहे. अनेकदा तिचे मराठी भाषेतील व्हिडीओ व्हायरल होत असतात.