कलर्स मराठीवरील 'अशोक मा.मा.' (Ashok Ma. Ma) मालिकेत आता नवीन वळण आले आहे. मालिकेत तणावपूर्ण वातावरण पाहायला मिळत आहे. गणपती विसर्जनानंतर सुरू झालेला नीलिमाच्या शोधाचा प्रवास आता एका नव्या वळणावर येऊन ठेपला आहे. घरातील सर्वांच्या मदतीने नीलिमाच्या घराचा पत्ता सापडतो.

नीलिमा ही अशोक मामांची बहीण आहे. त्यामुळे पत्ता मिळताच सगळ्यांच्या चेहऱ्यावर आनंद पसरतो. परंतु जेव्हा अशोक मा.मा. नीलिमाला भेटायला जातात तेव्हा तिचे थंड, कठोर वागणे पाहून त्यांच्या पायाखालची जमीनच सरकते. सख्खा भाऊ असूनही नीलिमा मामांच्या डोळ्यात न पाहता दार बंद करते. तिच्या आयुष्यात नक्की काय घडतंय, ती इतकी कशी बदलली? हे कोडे येणाऱ्या भागांमध्ये उलघडताना दिसणार आहे.

अशोक मामांना काही लोकांकडून नीलिमाच्या बिकट परिस्थितीबद्दल माहिती मिळते. घरात उभ्या असलेल्या संकटांमध्ये आता भैरवीचा नवरा अनिशच्या वागण्यामुळे आणखी गोंधळ वाढतो. लोक अशोक मामांच्या घरी पैसे वसूल करण्यासाठी येतात. एका बाजूला नीलिमाच्या मनातील गुपित आणि नात्यांचा ताण, तर दुसरीकडे भैरवी-अनिशमधील वाढत चाललेली दरी 'अशोक मा.मा.' हे सर्व कस नीट करणार हे पाहणे मनोरंजक ठरणार आहे.

'अशोक मा.मा.' मालिकेला आता अधिकच रंजक वळण आले आहे. प्रत्येक एपिसोड महत्त्वाचा असणार आहे. नात्यांची ही गुंतागुंत अशोक मामा कशी सोडवणार हे येणाऱ्या भागांमध्ये पाहायला मिळणार आहे. 'अशोक मा.मा.' मालिका कलर्स मराठी वाहिनीवर रात्री 8.30 वाजता पाहायला मिळते.