बॉलिवूड अभिनेत्री अ‍ॅमी जॅक्सन (Amy Jackson) तिच्या लग्नामुळे बऱ्याच दिवसांपासून चर्चेत होती. आता अ‍ॅमीने अभिनेता एडवर्ड वेस्टविकशी लग्नगाठ बांधली आहे. हा विवाह सोहळा इटलीमध्ये पार पडला. अ‍ॅमीने आपल्या लग्नाचे खास फोटो सोशल मीडियावर शेअर केले आहेत.

अ‍ॅमी जॅक्सन आणि एडवर्ड वेस्टविक (Ed Westwick) यांनी लग्न करून आपल्या नवीन आयुष्याची सुरुवात केली आहे. फोटोंमध्ये दोघेही खूप खुश दिसत आहेत. दोघांनीही इटलीमध्ये ख्रिश्चन पद्धतीने लग्न केले आहे. एडवर्ड हा ब्रिटिश अभिनेता आणि संगीतकार आहे. अ‍ॅमी जॅक्सन पांढऱ्या गाऊनमध्ये दिसली, तर एडवर्ड काळ्या पँटसह पांढरा ब्लेझर घातला होता.

अ‍ॅमी जॅक्सनने तिच्या चाहत्यांना ही गोड बातमी सोशल मीडियावर फोटो शेअर करून दिली आहे. अभिनेत्रीने कॅप्शनमध्ये लिहिले, 'प्रवास नुकताच सुरू झाला आहे. पहिल्या छायाचित्रात अ‍ॅमी कॅमेऱ्यासमोर पोज देत आहे. तर दुसऱ्या चित्रात अ‍ॅमी आणि एडवर्ड दोघेही पोज देताना दिसत आहेत. दोघांच्याही डोळ्यात खूप प्रेम पाहायला मिळत आहे. हे सुंदर फोटो एडवर्डने देखील सोशल मीडियावर शेअर केले आहेत.

बॅचलर पार्टी

अ‍ॅमी जॅक्सन आणि एडवर्ड वेस्टविक यांनी नुकतीच बॅचलर पार्टीही केली होती. जिथे दोघे एकमेकांवर प्रेमाचा वर्षाव करताना दिसले. आता दोघेही लग्नबंधनात अडकले आहेत. अ‍ॅमी आणि एडवर्ड हे दोघेही २०२२ पासून एकत्र असल्याचे म्हटलं जातं. अ‍ॅमी आणि एडवर्डने जानेवारीमध्ये साखरपुडा केला.

अ‍ॅमी जॅक्सन 5 वर्षांच्या मुलाची आई

अ‍ॅमी अनेक बॉलिवूड चित्रपटांमध्ये दिसली आहे. तिने बॉलिवूड सुपरस्टार अक्षय कुमारसोबत 'सिंग इज ब्लिंग' या चित्रपटातही काम केले आहे. अ‍ॅमीही पाच वर्षांच्या मुलाची आई आहे. वास्तविक, अभिनेत्री याआधी बिझनेसमन जॉर्ज पानायियोटोसह रिलेशनशिपमध्ये होती. दोघांचा साखरपुडा झाला होता. मात्र काही कारणास्थव साखरपुडा तुटला. पण अ‍ॅमीने 2019 मध्ये जॉर्जच्या मुलाला जन्म दिला. मुलाचं नाव अँड्रियास जॅक असे आहे.