Hina Khan Posted About Mucositis : 'ये रिश्ता क्या कहलाता हे' फेम अभिनेत्री हिना खानला (Hina Khan) ब्रेस्ट कॅन्सर झाल्यानंतर ती सध्या त्यावर उपचार घेत आहे. तिच्या केमोथेरपी सुरू असतानाच आता तिला आणखी एका आजाराने ग्रासले आहे. याबद्दल तिने नुकतीच आपल्या इनस्टाग्राम अकाऊंटवरून माहिती दिली असून म्यूकोसिटिस नावाचा हा आजार असल्याचे तिने त्यात सांगितले आहे. तसेच याबद्दल कोणाला काही उपाय माहीत असल्यास तेही सांगण्याबद्दल तिने चाहत्यांना आवाहन केले आहे.

हिना तिच्या स्तनांच्या कर्करोगामुळे (Breast Cancer) ग्रस्त असल्याची माहिती तिने काही महिन्यांपूर्वी आपल्या चाहत्यांना दिली होती. या उपचारादरम्यान तिला आधी केस गळण्याचा त्रास झाला होता. त्याबद्दलही तिने आपल्या सोशल मिडियावरून वेळोवेळी माहिती दिली होती. आता केमोथेरपी सुरू असताना अभिनेत्री हिनाला म्यूकोसिटिस हा तोंडाचा आजार झाल्याचे निदान झाले आहे.

या आजारामुळे तिला जेवण करता येत नसल्याचे तिने आपल्या पोस्ट मधून सांगितले आहे. '' जेव्हा तुम्ही खाऊ शकत नाही..'' अशा कॅप्शन खाली तिने ही पोस्ट केली आहे. केमोथेरपीचा हा एक दुष्परिणाम असल्याचे तिने सांगितले आहे.

३६ वर्षीय हिना खान ही आपल्या सोशल मीडिया अकाऊंटवरून सतत आपल्या चाहत्यांसोबत सक्रिय असते. तिच्या आयुष्यातील चढ - उतारांबद्दलची माहिती ती कायम सांगत असते. तिच्या या नव्या आजाराच्या पोस्टने तिच्या चाहत्यांची चिंता अधिक वाढली आहे.

हिनाने पोस्ट मध्ये काय लिहिले आहे ?

अभिनेत्रीने तिच्या इंस्टाग्राम अकाउंटवर एका पोस्टद्वारे लोकांना उपयुक्त उपायांबद्दल विचारले आहे. हिनाने आपल्या पोस्टमध्ये लिहिले आहे की, '' म्यूकोसिटिस हा केमोथेरपीचा आणखी एक परिणाम आहे. आपण काही खाऊच शकत नाही ही फार कठीण आहे. मी डॉक्टरांच्या सल्ल्याचे पालन करत आहे. तुमच्यापैकी कोणी यातून गेले असेल किंवा उपयुक्त उपाय माहीत असेल, तर कृपया सुचवा. मला खूप मदत होईल.''

म्यूकोसिटिस नेमका काय आहे?

म्यूकोसिटिस (Mucositis) हा आजार अनेकदा केमोथेरपीनंतर रुग्णाला होतो. यामुळे तोंडात दुखणे, फोड येणे आणि सूज येणे यासह अनेक समस्या उद्भवतात. त्यामुळे काही खाण्यास अथवा जेवण करण्यात रुग्णाला अडचणी येतात.