Actor Tiger Shroff Receives Death Threat: बॉलिवूड अभिनेता टायगर श्रॉफला जीवे मारण्याची धमकी दिल्याच्या प्रकरणाने सध्या खळबळ उडवली आहे. मुंबई पोलिसांनी याप्रकरणी एका आरोपीला अटक केली आहे. आरोपीने पोलिसांना सांगितले की, त्याला टायगर श्रॉफचा खून करण्यासाठी दोन लाख रुपये आणि एक शस्त्र देण्यात आले होते. मात्र, पोलिसांनी सखोल तपास केल्यानंतर या प्रकरणात कोणताही खरा पुरावा आढळला नसून ही बातमी खोटी असल्याचे समोर आले आहे.

आरोपीचे नाव मनीषकुमार सुजींदर सिंह असून तो मूळचा पंजाबचा आहे. तो सध्या मुंबईतील नालासोपारा भागात राहत होता. त्याने स्वेच्छेने मुंबई पोलिसांच्या कंट्रोल रूममध्ये फोन करून माहिती दिली की, एका गँगस्टरने त्याला टायगर श्रॉफला संपवण्याचे काम दिले आहे. या फोननंतर खार पोलिसांनी लगेच कारवाई केली आणि आरोपीला ताब्यात घेतले. चौकशीत मात्र धक्कादायक माहिती समोर आली, ही सर्व माहिती बनावट असून त्याचा कोणत्याही गुन्हेगारी टोळीशी संबंध नाही.

पोलिस तपासात असेही निष्पन्न झाले की मनीषकुमार सुजींदर सिंह हा मानसिकदृष्ट्या अस्थिर आहे आणि त्याने प्रसिद्धी मिळवण्यासाठी अशा प्रकारचा बनाव केला होता. त्याच्याकडे कोणतेही शस्त्र आढळले नाही आणि त्याचे कोणत्याही गँगस्टरसोबत प्रत्यक्ष संबंध नसल्याचे स्प्ष्ट झाले आहे. त्यामुळे पोलिसांनी त्याच्यावर बनावट माहिती पसरवण्याचा गुन्हा दाखल केला आहे.

या घटनेमुळे टायगर श्रॉफच्या चाहत्यांमध्ये काही वेळ चिंतेचे वातावरण निर्माण झाले होते, मात्र पोलिसांनी वेळीच केलेल्या कारवाईमुळे मोठा अनर्थ टळला. सध्या टायगर श्रॉफ पूर्णपणे सुरक्षित असून या प्रकरणी पोलिस अधिक तपास करत आहेत. बनावट माहिती पसरवणाऱ्यांविरुद्ध कठोर कारवाई केली जाईल, असा इशाराही पोलिसांनी दिला आहे.