एखादा कलाकार कितीही मोठा झाला आणि त्याला कितीही राष्ट्रीय-आंतरराष्ट्रीय पुरस्कार मिळवले. तरी त्या कलाकाराची रंगभूमीची ओढ कधीच संपत नाही. कोणताही हाडाचा कलाकार ठराविक वेळेनंतर पुन्हा रंगभूमीकडे वळतो. इथे होणाऱ्या तिसऱ्या घंटेसोबत व्यक्तिरेखेत शिरतो. प्रयोगांमागून प्रयोग करत त्यातच रमतो आणि जिवंत कला पाहण्याचा अनुभव रसिकांना देताना स्वत:लाही धन्य मानू लागतो. याला अभिनेते सचिन खेडेकरही याला अपवाद नाहीत.

सचिन खेडेकर (Sachin Khedekar) यांनी मराठीपासून हिंदी आणि दाक्षिणात्य चित्रपटांमध्ये आपल्या अभिनयाचा ठसा उमटवला आहे. ते आता तब्बल 21 वर्षांनी पुन्हा मराठी व्यावसायिक रंगभूमीकडे वळले आहेत. "आयुष्यात प्रत्येकाच्याच वाट्याला एक 'भूमिका' येते. भूमिका जगण्यासाठी तुम्ही प्रत्येक वेळी कलावंतच असण्याची गरज नसते..." असे म्हणत जिगिषा अष्टविनायक एक नवीन नाटक घेऊन येत आहेत. चंद्रकांत कुलकर्णी सादरकर्ते असलेल्या 'भूमिका' या नाटकाद्वारे सचिन खेडेकर रंगभूमीवर पुनरागमन करणार आहेत.

अभिनेते सचिन खेडेकर यांनी आजवर दमदार अभिनय कौशल्याच्या जोरावर मराठीत चित्रपट, मालिका, नाटक या तिन्ही माध्यमांत आपला ठसा उमटवला असून हिंदी, तेलुगू, गुजराती, तमिळ, मल्याळम चित्रपट तसेच वेब सीरिजमध्येही त्यांच्या अनेक भूमिका लक्षवेधी ठरल्या आहेत. आता आगामी 'भूमिका' या नाटकात ते कोणत्या रूपात रसिकांच्या भेटीला येतात याची उत्सुकता आहे. मात्र त्यांच्या भूमिकेचा खुलासा अद्याप झाला नाही आहे.

'भूमिका' या नाटकात इतर कोण कलाकार पाहायला मिळणार हे देखील अजून स्पष्ट झाले नाही. 'भूमिका' नाटकाचे लेखन क्षितीज पटवर्धन यांनी केले असून, चंद्रकांत कुलकर्णी या नाटकाचे दिग्दर्शन करत आहेत. सध्या नाटकाची जोरदार तालीम सुरू असून, याच महिन्यात हे नाटक रंगभूमीवर येणार असल्याचे घोषित करण्यात आले आहे.