Aadesh Bandekar Son: मराठी मनोरंजन विश्वातील प्रसिद्ध कपल अभिनेते आदेश बांदेकर आणि सुचित्रा बांदेकर यांचा मुलगा सोहम बांदेकर लवकरच विवाहबंधनात अडकणार आहे. मराठी चित्रपटसृष्टी आणि दूरदर्शन क्षेत्रातील लोकप्रिय चेहरा म्हणून ओळखले जाणारे आदेश बांदेकर नेहमीच आपल्या सांस्कृतिक, सामाजिक कार्यामुळे चर्चेत असतात. त्यांचा मुलगा सोहमने देखील स्वतःची ओळख निर्माण केली आहे. त्याने ‘ललित 205’ या मालिकेची निर्मिती केली तसेच ‘नवे लक्ष्य’ या मालिकेद्वारे अभिनय क्षेत्रात पदार्पण केले.

सध्या सोशल मीडियावर जोरदार चर्चा आहे की सोहमचा विवाह लोकप्रिय अभिनेत्री पूजा बिरारीसोबत होणार आहे. पूजा बिरारी ही मराठी मालिकांमधील लोकप्रिय अभिनेत्री आहे. ‘येड लागलं प्रेमाचं’ या मालिकेत तिने मंजिरी ही भूमिका साकारून प्रेक्षकांच्या मनात घर केले आहे.

राजश्री मराठीने आता सोहमच्या केळवणाचा एक खास व्हिडिओ सोशल मीडीयवर पोस्ट केला आहे. या व्हिडिओमध्ये आदेश बांदेकर आणि सुचित्रा बांदेकर यांच्यासह सोहमला अभिनेत्री सुकन्या मोने, पूर्वा गोखले, शिल्पा नवलकर आणि अभिजीत केळकर यांनी मिळून सोहमचं औक्षण केलं आणि सुचित्राने सोहमला मुंडावळ्या बांधल्या.

सोहम आणि पूजाच्या लग्नाच्या चर्चेमुळे चाहत्यांमध्ये उत्सुकता शिगेला पोहोचली आहे. मराठी मनोरंजनविश्वातील दोन लोकप्रिय कलाकार विवाहबंधनात अडकणार असल्याने चाहत्यांमध्ये आनंदाचे वातावरण आहे. आता सोहम आणि पूजा यांच्याकडून त्यांच्या लग्नाच्या अधिकृत घोषणेची सर्वजण वाट पाहत आहेत.