मराठी चित्रपटांची चर्चा फक्त देशातच नाही तर, जगभरामध्ये होते. जगभरामध्ये प्रसिद्ध असलेल्या टाईम्स स्क्वेअरवर मराठमोळा चित्रपट ‘अ व्हॅलेंटाईन्स डे’चे मोशन पोस्टर रिलीज करण्यात आले आहे. प्रेम कहाणी सोबतच आदमखोरी दुनियेतील एका भयानक गुन्ह्याचा उलगडा करून देणार या चित्रपटाचं कथानक आहे. गेल्या काही दिवसांपूर्वीच चित्रपटाची घोषणा करण्यात आली होती. टाईम्स स्क्वेअरच्या बिलबोर्डवर चित्रपटाचं मोशन पोस्टर रिलीज झाल्याने चित्रपटाची उत्सुकता चाहत्यांमध्ये आहे.

आजवर आपण टाईम्स स्क्वेअरच्या बिलबोर्डवर अनेक बॉलिवूड, टॉलिवूड चित्रपट रिलीज झालेले पाहिले असतील. पण पहिल्यांदाच टाईम्स स्क्वेअरच्या बिलबोर्डवर मराठी चित्रपटाचा मोशन पोस्टर रिलीज झालेला आहे. सध्या ह्या चित्रपटाची चाहत्यांमध्ये जोरदार चर्चा होत आहे. या चित्रपटाची निर्मिती फैरोज माजगांवकर करीत आहे. फैरोज माजगांवर या चित्रपटाच्या माध्यमातून फिल्म इंडस्ट्रीमध्ये डेब्यू करणार आहे. या चित्रपटाचे दिग्दर्शन रोहितराव नरसिंगे करीत आहेत. येत्या ७ जूनला हा चित्रपट महाराष्ट्रात सर्वत्र प्रदर्शित होईल.

चित्रपटाचे दिग्दर्शक रोहितराव नरसिंगे यांनी चित्रपटाबद्दल सांगितले, “मराठी चित्रपटसृष्टीत पहिल्यांदाच एका मराठी चित्रपटाचं मोशन पोस्टर ‘न्यूयॉर्क टाइम्स स्क्वेअर’वर प्रदर्शित झाल आहे. ही गोष्ट माझ्यासाठीच नाहीतर अवघ्या फिल्म इंडस्ट्रीसाठी अभिमानाची गोष्ट आहे. ‘न्यूयॉर्क टाइम्स स्क्वेअर’वर माझ्या चित्रपटाचं मोशन पोस्टर झळकलं, त्यामुळे माझ्यात वेगळाच आत्मविश्वास निर्माण झाला आहे की हा चित्रपट लोकांच्या मनावर राज्य करेल. आणि लोकांच्या पसंतीस पडेल.”

हास्यजत्रा फेम अभिनेता अरुण कदम, संजय खापरे, सुरेश विश्वकर्मा, अभिजित चव्हाण, अभिनेता आणि निर्माता फैरोज माजगावकर, अभिनेत्री अश्विनी कुलकर्णी अशी चित्रपटाची दमदार स्टार कास्ट असून अभिनेत्री चैताली विजय चव्हाण पाहुण्या कलाकाराच्या भूमिकेत आहे. शिवाय अदिन माजगांवकर आणि अली माजगांवकर हे बालकलाकार देखील आहेत.