Uttar Pradesh Meerut Aunt Murder By Nephew उत्तरप्रदेशातील मेरठमध्ये नात्याला काळिमा फासणारी घटना समोर आली आहे. १७ वर्षीय अल्पवयीन पुतण्याने घरात बसलेल्या मावशीवर धाड धाड गोळ्या झाडून हत्या केली. या दुर्घटनेत पीडितेचा जागीच मृत्यू झाला. या प्रकरणी पोलिसांत तक्रार दाखल करण्यात आली असून पोलीस खोल तपास करत आहेत. पोलिसांच्या प्राथमिक अंदाजानुसार, कौटुंबिक वादातून ही हत्या झाली असावी. तसेच आरोपी मुलाने घटनास्थळावरुन पळ काढला आहे. सदर घटना आज सकाळच्या सुमारास घडली.

मिळालेल्या माहितीनुसार, आरोपी मुलाचे नाव शिवा असे असून मृत महिलेचे नाव पूजा त्यागी असे आहे. सदर घटना उत्तर प्रदेश मधील मेरठ जिल्ह्यातील गणेशपूर गावात आज म्हणजेच ५ फेब्रुवारी गुरुवारी सकाळच्या सुमारास घडली. पूजा त्यागी ही शिवाची नात्याने मावशी होती. आज सकाळी त्या घरात एकट्या असताना शिवाने मागून येऊन त्यांच्या डोक्यावर बंदूक रोखली.

घरात कोणीही नसल्याची संधी साधून शिवाने त्याच्या मावशीवर धाड धाड गोळ्या झाडल्या. या आवाजाने आजूबाजूचे नागरिक तातडीने घटनास्थळी दाखल झाले. मात्र तोपर्यंत शिवाने घटनास्थळावरुन पळ काढला होता. घडलेल्या घटने प्रकरणी पोलिसांना माहिती देण्यात आली. पोलिसांनी घटनास्थळी दाखल होत पंचनामा केला.

तसेच आरोपी शिवा विरोधात गुन्हा दाखल करण्यात आला. पोलीस या घटनेचा अधिक तपास करत असून हे हत्येचं मूळ कारण अद्यापही समोर आलेलं नाही. पोलीस शिवाचा शोध घेत आहेत. या घटनेने परिसरात खळबळ उडाली असून या धक्कादायक घटनेनंतर इतक्या लहान वयात मुलांच्या हातात बंदूक येते कशी? असा संतापजनक प्रश्न उपस्थित केला जात आहे.