लहान मुलांच्या खेळण्यातील नोटाद्वारे उघडपणे फसवणुकीचा खेळ मांडणाऱ्या एका टोळीचा पर्दाफाश करण्यात ठाणे शहर पोलिसांनी यश आले आहे. याप्रकरणी भिवंडीमधील संजय कुमार पकौडीलाल भारती (४३) याला कापूरबावडी पोलिसांनी अटक करत, त्यांच्याकडून खेळण्यातील नोटा व सोन्यासारख्या दिसणाऱ्या ३८ बिस्कीट जप्त केली आहेत. तसेच भारती याच्या चार साथीदारांची नावे पुढे आली आहेत . तसेच भारती याला येत्या ११ नोव्हेंबरपर्यंत पोलिस कोठडी मिळाली आहे.

मिळालेल्या माहितीनुसार, तक्रारदार नितेश शेळके यांना एका इसमाने एक लाख रुपये दिल्यास त्या बदल्यात तीन आठवड्यामध्ये तीन लाख रुपये देतो, असे आमिष दाखवले होते. मात्र ते न मिळाल्याने त्याबाबत तक्रारदारांना संशय आल्याने त्यांनी कापूरबावडी पोलिस ठाण्यात धाव घेत, त्याबाबत तक्रार केली. दरम्यान तक्रारदारांना ३ नोव्हेंबर रोजी साकेत बाळकुम रोड येथे त्या इसमाने तो नोटा घेऊन येणार असल्याचे सांगितले.

ही माहिती तक्रारदारांनी पोलिसांना दिल्यानंतर तेथे सापळा रचण्यात आला. त्यामध्ये तक्रारदारांना खऱ्या नोटांच्या बदल्यात खेळण्यातल्या बनावट नोटा देत असताना, संजयकुमार भारती याला पोलिसांनी ताब्यात घेतले. याच दरम्यान त्याच्या साथीदारांनी संधीचा फायदा घेऊन तिथून पळ काढला. तर ताब्यात घेतल्यानंतर भारती यांच्या घराची झडती घेतल्यावर मोठ्या प्रमाणात नागरिकांची फसवणूक करण्याचा कट समोर आला. तसेच त्या खेळण्यातील नोटा, सोन्याच्या बिस्किटासारखे बनावट पिवळ्या धातूंची बिस्किटे सापडले.

यामध्ये पाचशे रुपयांच्या नोटांचे प्रत्येकी १०० बंडल असलेले एकूण ३६० बंडल सापडले. या पैशांवर फॉर स्कूल प्रोजेक्ट युज ओन्ली असे इंग्रजीत आणि भारतीय बच्चो का बँक असे छापलेले होते. तसेच सोन्यासारखी दिसणारे त्याच्यावर सुईस्से १०० ग्रॅम फाइन गोल्ड ९९९.९ असे इंग्रजीत लिहिलेले एकूण ३८ पिवळ्या धातूंची बिस्किट आणि गुन्ह्यातील दुचाकी हे जप्त केले आहे. ही कारवाई तत्कालीन वरिष्ठ पोलिस निरीक्षक प्रवीण माने यांच्या मार्गदर्शनाखाली करण्यात आली असून पुढील तपास वरिष्ठ पोलीस निरीक्षक मंजुषा भोंगळे यांच्या मार्गदर्शनाखाली तपास सुरू आहे.