Summary -

• उत्तर प्रदेशमध्ये ऑनर किलिंगची धक्कादायक घटना

• गर्लफ्रेंड आणि बॉयफ्रेंडची फावड्याने वार करत हत्या

• मृतदेह नदीकाठी पुरल्याचा प्रकार उघड

• पोलिसांनी २४ तासांत प्रकरणाचा उलगडा केला

उत्तर प्रदेशमध्ये 'सैराट'सारखी भयंकर घटना घडली. तरुणीला मध्यरात्री बॉयफ्रेंडसोबत नको त्या अवस्थेत कुटुंबीयांनी पकडलं. संतप्त झालेल्या कुटुंबीयांनी दोघांची फावड्याने हत्या केली. त्यानंतर त्यांचे मृतदेह नदीच्या काठावर खड्डा खोदून पुरले. दोघेही बेपत्ता असल्याचा त्यांनी बनाव रचला पण अखेर या प्रकरणाचा उलगडा करण्यात पोलिसांना यश आले. पोलिसांनी या प्रकरणी तरुणीच्या भावाला अटक केली. या घटनेमुळे उत्तर प्रदेशमध्ये खळबळ उडाली आहे.

मिळालेल्या माहितीनुसार, उत्तर प्रदेशच्या मुरादाबादमधील पाकबारा पोलिस ठाण्याच्या हद्दीतील उमरी सबजीपूर गावात ही धक्कादायक घटना घडली. याठिकाणी राहणाऱ्या तरुणीचे समोरच्या घरात राहणाऱ्या तरुणासोबत दोन वर्षांपासून प्रेमसंबंध होते. हा तरुण दुसऱ्या धर्माचा होता. हा तरुण गर्लफ्रेंडला भेटण्यासाठी मध्यरात्री तिच्या घरी आला होता. अचानक तरुणीच्या कुटुंबीयांना जाग आली. त्यांनी खोलीचे दार उघडले तर दोघेही नको त्या अवस्थेत पकडले गेले. तरुण-तरुणी दोघेही प्रचंड घाबरले. त्यांना या अवस्थेत पाहून कुटुंबीयांना राग अनावर झाला.

तरुण-तरुणी दोघांनीही त्यांची माफी मागितली पण त्याचा काहीच उपयोग नाही झाला. तरुणाने पळून जाण्याचा देखील प्रयत्न केला. पण तरुणीच्या कुटुंबीयांनी रागाच्या भरात दोघांना बेदम मारहाण करत एका खोलीमध्ये डांबून ठेवले. त्यानंतर फावडा आणून आधी तरुणाची हत्या केली. बॉयफ्रेंडची डोळ्यासमोर हत्या झाल्याचे पाहून तरुणी चक्कर येऊन पडली. त्यानंतर तिच्या कुटुंबीयांनी त्याच फावड्याने तिची देखील निर्घृण हत्या केली. 'तू आमचे नाक कापले. आता काहीच उरलं नाही. तुला देखील जगण्याचा अधिकार नाही.', असे म्हणत त्यांनी मुलीचा देखील जीव घेतला.

दोघांची हत्या केल्यानंतर त्यांनी दोन्ही मृतदेह घरापासून दोन किमी अंतरावर असलेल्या गगन नदीच्या काठावर खड्डा खोदून त्यामध्ये पुरले. मुलगा घरी आला नाही त्यामुळे मुलाचे कुटुंबीय चिंतेत आले आणि त्यांनी पोलिस ठाण्यात धाव घेत तक्रार दाखल केली. पोलिस या तरुणाचा शोध घेत होते अशातच त्याची हत्या झाल्याचे समोर आले. २४ तासांतच हे हत्याकांडाचे प्रकरण बाहेर आले. तरुणाच्या भावाने पोलिस ठाण्यात तक्रार दाखल केल्यानंतर पोलिसांनी मुलीच्या ३ भावांसह कुटुंबातील ७ जणांविरोधात हत्येचा गुन्हा दाखल केला. या घटनेमुळे गावात तणावाचे वातावरण आहे.