पराग ढोबळे, नागपूर

नागपूरमध्ये भरचौकात गोळीबार आणि चॉपरने हल्ला करत तरुणाची निर्घृण हत्या करण्यात आल्याची घटना घडली. क्षुल्लक वादातून तरुणाला जिवानिशी संपवलं. नागपूरच्या मानकापूर पोलिस ठाण्याच्या हद्दीतील ही भयानक घटना आहे. या हत्याकांडाचा थराराक व्हिडिओ समोर आला असून व्हायरल होत आहे. याप्रकरणी पोलिसांनी चौघांविरोधात गु्न्हा दाखल केला असून तिघांना अटक केली. फरार आरोपीचा शोध सुरू आहे.

मिळालेल्या माहितीनुसार, नागपूरच्या मानकापूर पोलिस ठाण्याच्या हद्दीतील गोधनी प्रकाश नगर परिसरात ही धक्कादायक घटना घडली आहे. भाजी बाजारात रात्री चौघांनी शिवीगाळ करत गोळीबार केला आणि चॉपरने तरुणावर हल्ला केला. या गोळीबार आणि हल्ल्यात तरुणाचा मृत्यू झाला तर एक जण जखमी झाला. सोहेल खान असे मृतकाचे नाव असून प्रकाश नगर येथील गोविंद लॉनजवळ ही घटना घडली.

नागपूरमध्ये घडलेल्या या गोळीबाराच्या घटनेमुळे खळबळ उडाली आहे. नागपुरातील या हत्याकांडाचा थरकाप उडवणारा व्हिडिओ समोर आला असून व्हायरल होत आहे. या व्हिडीओमध्ये दिसत आहे की, एक जण बंदूक घेऊन आजू बाजूच्या लोकांना धाक दाखवत आहे. तर दुसरे दोघे जण सोहेल खान हा तरुण मेलेला असताना सुद्धा चॉपरने वार करत आहे. या घटनेमुळे नागपूरच्या गोधनी प्रकाश नगर परिसरात दहशतीचे आणि तणावाचे वातावरण आहे. याठिकाणी पोलिसांना बंदोबस्त तैनात करण्यात आला आहे.

या हत्याकांड प्रकरणी पोलिसांनी रात्री उशिरापर्यंत धीरज घोडमारे, राजेंद्र मरकाम, आणि भूषण या ३ आरोपींना अटक केली. तर चौथा आरोपी चंदू डोंगरे फरार आहे. दरम्यान घटनेनंतर तणाव निर्माण झाला होता. काही तरुणांनी घोषणाबाजी करत काही दुचाकीची तोडफोड करण्याचा प्रयत्न केला. मेयो रुग्णालयासमोर देखील लोक जमले आणि तेथे देखील तणाव निर्माण झाला होता. भाजीचा ठेला लावण्यावरून झालेल्या वादातून हा प्रकार घडल्याचे बोलले जात आहे.