राजस्थानमधील झालावाड जिल्ह्यातील कोथला घट्टी गावात रविवारी एका लग्नसमारंभात घडलेल्या धक्कादायक घटनेने संपूर्ण परिसर हादरून गेला. आनंदाच्या वातावरणात सुरू असलेला सोहळा क्षणार्धात दुःखात बदलला. मेहुणीच्या लग्नाला आलेल्या भाऊजीची साडूने हत्या केल्याचे समोर आले आहे. या प्रकरणी संबंधित मेहुणीच्या पतीवर गुन्हा दाखल करण्यात आला आहे. पोलीस या घटनेचा तपास करत आहेत.

मिळालेल्या माहितीनुसार, मोडक येथील रहिवासी नानुराम यांचा २६ वर्षीय मुलगा बबलू भिल हा आपल्या मेहुणीच्या लग्नासाठी कोथला घट्टी येथे आला होता. बबलू भिल याचा वाद झालावाड शहरातील संजय कॉलनीत राहणाऱ्या कमलेश नावाच्या तरुणासोबत झाला. सुरुवातीला किरकोळ भांडण वाटणारा हा वाद काही क्षणांतच तीव्र झाला.

वाद वाढताच कमलेशने संतापाच्या भरात बबलूवर चाकूने हल्ला केला. या अचानक झालेल्या हल्ल्यामुळे लग्नस्थळी एकच गोंधळ उडाला. बबलू गंभीर जखमी अवस्थेत कोसळला. त्याला तातडीने कुटुंबीय रुग्णालयात दाखल केले. डॉक्टरांनी त्याच्यावर उपचार सुरू केले आणि त्याचा जीव वाचवण्याचा प्रयत्न केला, मात्र अतिरक्तस्राव झाल्यामुळे सायंकाळी त्याचा मृत्यू झाला.

या घटनेची माहिती मिळताच मंदावर पोलीस ठाणे येथील पोलिसांनी तात्काळ घटनास्थळी धाव घेतली. पोलिसांनी मृतदेह शवविच्छेदनासाठी ठेवला असून पुढील कायदेशीर प्रक्रिया सुरू केली आहे. तसेच आरोपी कमलेशला लगेच ताब्यात घेण्यात आले असून त्याची चौकशी सुरू आहे.