अक्षय बडवे, साम प्रतिनिधी

पुणे शहरात पुन्हा एकदा मोठ्या प्रमाणात ड्रग्सचा साठा सापडलाय. पुणे पोलिसांच्या गुन्हे शाखेने कारवाई करत एमडी ड्रग्सचा साठा जप्त केलाय. या ड्रग्सची किंमत २३ लाख रुपये असून याप्रकरणात अहमद खान नावाच्या व्यक्तीला अटक करण्यात आलीय. अहमद खान कोणत्या ड्रग्स रॅकेटचा भाग आहे का? याबाबत पोलीस चौकशी करण्यात येत आहे.

दरम्यान पुणे शहरात याआधीही ड्रग्स सापडले होते. आता परत शहरात ड्रग्स सापडल्याने खळबळ उडालीय. गुन्हे शाखेने अहमद खानकडून ११० ग्रॅम वजनाचा MD ड्रग्सचा साठा जप्त केलाय. अटक करण्यात आलेल्या अहमद खान हा येरवडा भागातील राहणार आहे. त्याचा कोणत्या रॅकेटशी संबंधित आहे का याचा तपास पोलिसांकडून सुरू आहे. ड्रग्स माफिया ललित पाटीलमुळे पुणे शहर चर्चेत आले होते. ललित पाटील पुण्यातील ससून रुग्णालयातून ड्रग्ज रॅकेट चालवत होता.

ललित पाटील ससून रुग्णालयात आजारपणाचं कारण देत ड्रग्स रॅकेट चालवत होता. त्यावेळी ससून रुग्णालयातील गेटवर २ कोटी १४ लाखांचे ड्रग्स सापडले होते, त्यानंतर पुण्यातील ड्रग्स रॅकेट उघडकीस आले होते. या रॅकटेचा तपास करताना अनेक मोठ्या व्यक्तींचा यामध्ये हात असल्याची माहिती उघड झाली होती. पुणे शहरातील कुरकूंभ येथे ड्रग्ज कारखाना सापडल्याने एकच खळबळ उडाली होती. या ड्रग्ज प्रकरणाचे थेट लंडन कनेक्शन असल्याचं समोर आलं होतं.

यावरुन कसबा मतदार संघाचे काँग्रेस आमदार रविंद्र धंगेकर यांनी राज्य सरकारवरवर गंभीर आरोप केले होते. मागील वर्षी पुण्यात एका आंतरराष्ट्रीय ड्रग्स रॅकेटचा पदार्फाश झाला होता. ३७०० कोटी रुपयांचे ड्रग्ज जप्त करण्यात आले होते. यातील १८०० कोटी रुपयांचे ड्रग्ज लंडनमधून मागवण्यात आले होते. कोट्यवधींचे ड्रग्ज बनवण्याचे रसायन वीरेंद्र सिंग बरोरिया नावाच्या व्यक्तीने पुरवल्याची माहिती पोलिसांनी दिली होती. इतकेच नाही तर पुणे पोलिसांनी पुणे, सांगली आणि दिल्ली ड्रग्स जप्त केली होती.

येथे सापडलेले कोट्यवधींच्या ड्रग्जच्या साठ्यात संपूर्ण केमिकल वीरेंद्रसिंग बरोरिया याने पुरवले होते. वीरेंद्र सिंग बरोरिया हा पुण्यातील ड्रग्ज रॅकेटचा मास्टरमाइंड संदीप धुनियाचा जवळचा सहकारी आहे.