नांदेड : नांदेड जिल्ह्यातून एक धक्कादायक आणि संतापजनक अशी बातमी समोर आली आहे. आजी आणि नातवच्या नात्याला काळीमा फासणारी ही घटना घडली आहे. नातवाने पैशांसाठी आजीच्या तोंडात बोळा कोंबून तिची हत्या केलीय. मारोती उर्फ बाळू पांडुरंग वानखेडे (वय ३५) असं नातवाचं नाव आहे. तर त्याने गयाबाई रामजी तवर (वय ७५) असणाऱ्या आजीची पैशांसाठी हत्या केली आहे. ही घटना नांदेड जिल्ह्यातील हिमायतनगर येथील आहे.

गयाबाई रामजी तवर या टेम्भुर्णी येथील रहिवासी आहेत. त्या एकट्याच राहत असून त्यांच्याकडे नऊ एकर जमीन आणि राहतं घर आहे. त्यांच्या तीनही मुलींचं लग्न झालं असून त्या वेगवेगळ्या ठिकाणी राहतात. गयाबाईंनी सोमवारी बँकेतून ९० हजार रुपये काढले होते. तसेच त्यांनी आपल्या मुलीकडे असलेले १ लाख ८४ हजार रुपये किंमतीचे दागिने घरी आणले होते.

पोलिसांनी दिलेल्या माहितीनुसार, ३ जून रोजी आरोपी नातू मारोतीने घरात प्रवेश जात आजीला मारहाण करण्यास सुरुवात केली आणि तिची हत्या केली. त्यानंतर घरातील दागिने आणि रोख रक्कम घेऊन तो घटनास्थळावरुन फरार झाला. गुरूवारी रात्रीच्या सुमारास गयाबाईच्या घरातून मृतदेहाचा दुर्गंध येऊ लागला. गावकऱ्यांनी पोलिसांना याची माहिती दिली.

या घटनेनंतर पोलिसांनी घटनास्थळी धाव घेत तपास सुरू केला आणि गयाबाईंच्या मुलींना तसेच नातेवाईकांना घटनास्थळी उपस्थित राहण्यास सांगितलं. नातेवाईकांच्या उपस्थितीनंतर घराचे दार उघडण्यात आले असता, घरात गयाबाईंचा मृतदेह आढळून आला. पोलिसांनी नातवावर संशय व्यक्त केला. यावेळी पोलिसांचा अंदाज खरा ठरला आहे. पोलिसांनी आरोपी मारोती वानखेडेला ताब्यात घेत अटक केली आहे. यावेळी पोलिसांनी त्याला या हत्येबाबत विचारले असता, त्याने हत्येची कबुली दिली. पैशांच्या हव्यासापोटी आजीला मारल्याचं आरोपी मारोतीनं मान्य केलं, अशी माहिती पोलिसांनी दिली आहे.