पराग ढोबळे, नागपुर|ता. २ ऑक्टोंबर

Four Death In Same Family: एकाच कुटुंबातील चौघांनी आत्महत्या केल्याची धक्कादायक घटना नागपूरमध्ये घडली आहे. नागपूर जिल्ह्याच्या नरखेड तालुक्यातील मोवाड गावात घडलेल्या या घटनेने सर्वत्र एकच खळबळ उडाली आहे. मृतांमध्ये पती- पत्नी आणि दोन मुलांचा समावेश असून संपूर्ण कुटुंबाने टोकाचे पाऊल का उचचले? याबाबतचे कारण अद्याप समोर आले नसून पोलीस अधिक तपास करत आहेत.

एकाच घरातील चौघांचे मृतदेह..

याबाबत सविस्तर माहिती अशी की, नागपुर जिल्ह्यामधील नरखेड तालुक्यातील मोवाड गावात एकाच घरातील चौघांचे मृतदेह आढळल्याने एकच खळबळ उडाली आहे. मृतांमध्ये पती, पत्नी आणि दोन मुलांचा समावेश आहे. या कुटुंबाने सामुहिक आत्महत्या केल्याचा प्राथमिक अंदाज पोलिसांकडून वर्तवण्यात येत असून भयंकर घटनेने गावात भितीचे वातावरण पसरले आहे.

नागपुर हादरलं!

विजय पचोरी (वय, ६८) त्यांच्या पत्नी मालाबाई पचोरी (वय, ५५) मुलगा दीपक पचोरी (वय, ३८) व गणेश पचोरी (वय, ३८) अशी मृतांची नावे आहेत. विजय पचोरी हे सेवानिवृत्त शिक्षक आहेत, तर त्यांच्या पत्नी गृहिणी असल्याचे सांगण्यात येत आहे. यामधील तीन मृतदेह हे हात पाय बांधलेल्या अवस्थेत आढळून आले तर एक मृतदेह फासाला लटकलेल्या अवस्थेत होता. त्यामुळे तिघांचे हातपाय बांधून त्यांना फाशी दिल्यानंतर चौथ्या व्यक्तीने स्वतः गळफास घेतल्याचा अंदाज व्यक्त केला जात आहे.

या बाबतची माहिती मिळताच नागपूर ग्रामीण पोलिसांनी घटनास्थळी धाव घेत मृतदेह ताब्यात घेतले आहेत. तसेच सध्या फॉरेन्सिकची टीमही घटनास्थळी दाखल झाली आहे. दरम्यान, या संपूर्ण कुटुंबाने इतके टोकाचे पाऊल का उचचले असावे? ही सामुहिक आत्महत्या आहे की हत्या? असे अनेक प्रश्न उपस्थित होत असून पोलीस याबाबतचा तपास करत आहेत.