Latur Shyamnagar MIDC Mother Killed 1 years Daughter लातूरमध्ये मन सुन्न करणारी घटना घडली आहे. पतीला कामावरून येण्यासाठी उशीर झाल्याने संतापलेल्या जन्मदात्रीने पोटच्या दीड वर्षीय मुलीची चाकूने वार करत हत्या केली असल्याचा संतापजनक प्रकार उघडकीस आला आहे. पोलिसांनी याप्रकरणी आरोपीला अटक केली आहे. सदर घटना लातूर शहरातील एमआयडीसी परिसरातील श्याम नगर भागात घडली आहे. याबाबत एमआयडीसी पोलिस ठाण्यात गुन्हा दाखल करण्यात आला आहे. या घटनेने परिसरात खळबळ उडाली असून रागावर नियंत्रण नसेल तर त्याचे गंभीर परिणाम होऊ शकतात याचे उत्तम उदाहरण आहे.

मिळलेल्या माहितीनुसार, मृत मुलीचे वडील विक्रम जगन्नाथ चौगुले (वर्षे ३४) हे मजुरी करून आपल्या कुटुंबाचा उदरनिर्वाह करतात. सोमवारी म्हणजेच १९ जानेवारी २०२६ रोजी पहाटेच्या सुमारास विक्रम हे कामाला गेले असता त्यांना घरी परतण्यासाठी काहीसा उशीर झाला. याच कारणावरून त्यांची पत्नी अश्विनी विक्रम चौगुले (वर्षे ३०) हिचा संताप अनावर झाला.

रागाने संतापलेल्या अश्विनीने घरातील धारदार चाकू आणला अन् आपल्या दीड वर्षांच्या निष्पाप मुलीवर अत्यंत क्रूरपणने सपासप वार केले. आरोपी मातेने मुलीच्या तोंडावर, पोटावर, छातीवर, कमरेवर, डोक्यात आणि गुप्तांगावर चाकूने सपासप वार केले. आई करत असलेल्या क्रूर हल्ल्यात तो इवलुसा जीव विव्हळत होता. मात्र त्या वैरीण आईला तिची जरा देखील दया आली नाही.

या भीषण हल्ल्यात पीडित मुलगी गंभीर जखमी झाली आणि तिचा जागीच मृत्यू झाला. विक्रम हे घरी येताच त्यांना घडलेला प्रकार समजला. त्यांनी तातडीने पोलीस ठाणे गाठले आणि पत्नीच्या क्रूरतेचा पाढा वाचत तक्रार दाखल केली. याप्रकरणी पोलिसांनी आरोपी अश्विनी हिच्या विरुद्ध गुन्हा दाखल केला आहे. तसेच पुढील तपास सुरु आहे. दरम्यान या घटनेने परिसरात खळबळ उडाली आहे.