दिवसेंदिवस सायबर गुन्हेगारीचा विळखा वाढत आहे. ऑनलाईन लुटारूंची दहशत नागरिकांना हैराण करत आहेत. अशातच केरळ पोलिसांनी मोहीम हाती घेत मोठी कारवाई पार पाडली आहे. "ऑपरेशन साय-हंट" नावाच्या या मोहिमेत २६३ व्यक्तींना अटक करण्यात आली आहे आणि १२५ संशयितांवर देखरेख ठेवण्यात आली आहे. पोलिसांनी सांगितले की, राज्यभरात ३८२ गुन्हे दाखल करण्यात आले आहेत.

मिळालेल्या माहितीनुसार, केरळ पोलिसांनी राज्यभरात सायबर आणि आर्थिक गुन्ह्यांविरुद्ध "ऑपरेशन साय-हंट" नावाची मोहीम हाती घेतली आहे. या मोहिमेअंतर्गत गुरुवारी सकाळी ६ वाजता ही कारवाई सुरु केली. या कारवाईदरम्यान राज्यभरातील प्रत्येक पोलिस ठाण्याच्या परिसरात एकाच वेळी छापे टाकण्यात आले. एडीजीपी एस. श्रीजीत यांच्या देखरेखीखाली आणि रेंज डीआयजी आणि जिल्हा पोलिस प्रमुखांच्या देखरेखीखाली कारवाई करण्यात आली.

या कारवाईत ऑनलाइन ट्रेडिंग फसवणूक, सोशल मीडिया जाहिरातींमध्ये फसवणूक, बनावट कर्ज आणि गुंतवणूक घोटाळे आणि ऑनलाइन नोकरीत फसवणूक अशा प्रकारच्या गुन्हेगारी अंतर्गत पोलिसांनी तब्बल २६३ व्यक्तींना अटक केली. तसेच राज्यभरात ३८२ गुन्हे दाखल करण्यात आले.

पोलिसांना तपासा दरम्यान मिळलेल्या आकडेवारीवरून असे दिसून आले की २,६८३ आरोपींनी चेक वापरून पैसे काढले होते, ३६१ जणांनी एटीएममधून पैसे काढले होते आणि ६६५ जणांनी बँक खात्यातून फसवणूक करून नागरिकांना लुटले. पोलिसांनी मोठी कारवाई करत या आरोपींविरोधात गुन्हा दाखल करण्यात आला आहे. दरम्यान एका दिवसात सायबर गुन्ह्यांविरुद्ध आतापर्यंतची सर्वात मोठी कारवाई मानली जात आहे.