हिंदुत्ववादी नेते धीरेंद्र प्रताप सिंह यांची गोळ्या झाडून हत्या झालीय. विशेष म्हणजे लखनौमधील दुबग्गा पोलीस ठाण्याच्या हद्दीतच हत्याची घटना घडलीय. धीरेंद्र प्रताप सिंह हे आपल्या 'फॉर्च्युनर' एसयूव्हीमधून जात असताना हल्लेखोरांनी त्यांच्यावर गोळ्या झाडल्या. हत्या केल्यानंतर हल्लेखोरांनी त्यांचा मृतदेह कालव्यात फेकून दिला. धीरेंद्र प्रताप सिंह हे मूळचे उन्नावचे रहिवासी होते. सिंह हे पीजीआय (PGI) परिसरात राहत होते. जमिनीच्या वादातून ही हत्या झाली असावी, असा पोलिसांचा संशय आहे.

हिंदू नेते धीरेंद्र प्रताप सिंह यांचा मृतदेह आढळल्याने खळबळ उडालीय. सुशांत गोल्फ सिटी पोलीस ठाण्याच्या हद्दीतून शनिवारी बेपत्ता झालेल्या धीरेंद्र प्रताप सिंह यांचा शोध घेण्यासाठी पोलिसांची अनेक पथके कार्यरत होती. आता त्यांचा मृतदेह दुबग्गा भागातील एका कालव्यात सापडला आहे. प्राथमिक माहितीनुसार, त्यांची गोळ्या झाडून हत्या करण्यात आली असावी, मात्र, मृत्यूचे नेमके कारण आणि हत्येमागची संपूर्ण परिस्थिती पोलीस तपास व शवविच्छेदन अहवालानंतरच स्पष्ट होणार आहे.

मृत धीरेंद्र प्रताप सिंह हे हिंदू युवा वाहिनी'चे विभागीय प्रभारी म्हणून कार्यरत होते आणि त्यांना सरकारी सुरक्षाही पुरवण्यात आली होती. शनिवारी ते अचानक बेपत्ता झाल्यानंतर सुशांत गोल्फ सिटी पोलीस ठाण्यात त्याबाबत तक्रार दाखल करण्यात आली होती. त्यानंतर पोलिसांनी त्यांचा शोध सुरू केला, परंतु अनेक तासांच्या शोधकार्यानंतर दुबग्गा भागातील एका कालव्यात त्यांचा मृतदेह सापडल्याची बातमी समोर आल्याने खळबळ उडाली आहे.

या घटनेची माहिती मिळताच वरिष्ठ पोलीस अधिकारी घटनास्थळी दाखल झाले. फॉरेन्सिक पथकही घटनास्थळी पोहोचले असून त्यांनी तपास सुरू केला आहे. कालवा आणि परिसरातून महत्त्वपूर्ण पुरावे गोळा केले जात आहेत. प्रकरणाचे गांभीर्य लक्षात घेता, एसटीएफचे (STF) पथकही घटनास्थळी दाखल झाले असून तपासात सहभागी झाले आहे.