Crime News : गणेश विसर्जनासाठी निघालेल्या मिरवणुकीत एका तरुणावर जीवघेणा हल्ला झाला. धारदार शस्त्राने झालेल्या हल्ल्यानंतर तरुण गंभीररित्या जखमी झाला. जखमी अवस्थेतील तरुणाला रुग्णालयात उपचारासाठी नेण्यात आले. रुग्णालयामध्ये उपचारादरम्यान या तरुणाचा मृत्यू झाला. ही घटना मेरठमधील सरधना पोलीस स्टेशन परिसरात घडली आहे.

मिळालेल्या माहितीनुसार, शनिवार (६ सप्टेंबर) सरधना पोलीस स्टेशन परिसरात गणेश विसर्जन मिरवणूक काढली जात होती. यादरम्यान दुचाकीवरुन आलेल्या काहीजणांना बॉबी नावाच्या २१ वर्षीय तरुणावर धारदार शस्त्राने हल्ला केला. जखमी झालेल्या बॉबीला रुग्णालयात दाखल करण्यात आले. उपचार सुरु असताना बॉबीचा मृत्यू झाला.

बॉबीचा शेखर नावाच्या तरुणाशी वाद होता. जिमला जाताना दोघांमध्ये एका गोष्टीवरुन वाद झाला. शेखरने गणेश विसर्जन मिरवणुकीदरम्यान बॉबीवर चाकूने वार केला. त्यानंतर त्याने गर्दीचा फायदा घेत बाईकवरुन पळ काढला असा आरोप बॉबीच्या कुटुंबियांनी केला आहे. भर मिरवणुकीत झालेल्या खुनाच्या घटनेचा व्हिडीओ समोर आला आहे.

घटनेशी संबंधित उपलब्ध व्हिडीओच्या आधारे बॉबीच्या कुटुंबियांनी दोघांच्या विरोधात तक्रार दिली आहे. सरधना पोलीस स्टेशनमध्ये संबंधित कलमात गुन्हा दाखल करण्यात आला आहे. या प्रकरणी पोलिसांनी तात्काळ कारवाई करत आरोपींना अटक केली आहे. इतर दोन संशयितांना देखील ताब्यात घेण्यात आल्याची माहिती समोर आली आहे.