हैदराबादमधील सरदार वल्लभभाई पटेल नॅशनल पोलीस अकॅडमीमध्ये एका महिला प्रशिक्षणार्थी आयपीएस अधिकाऱ्याने आपल्या बॅचमधील सहकारी अधिकारी कृष्ण रेड्डी यांच्यावर लैंगिक छळाचे गंभीर आरोप केले आहेत. या प्रकरणी पोलिसांनी उदय कृष्ण रेड्डी यांच्याविरोधात गुन्हा दाखल करून तपास सुरू केला आहे. कॉन्स्टेबल ते आयपीएस अधिकारी असा करियरचा प्रवास असलेले उदय कृष्ण रेड्डी आता वादाच्या भोवऱ्यात सापडले आहेत. हैद्राबादमधील अकॅडमीतील एका महिला प्रशिक्षणार्थी अधिकाऱ्याने तक्रार करत आरोप केला आहे की, रेड्डी यांनी सुमारे तीन आठवड्यांपर्यंत तिचा वारंवार लैंगिक छळ केला, मारहाण केली आणि ब्लॅकमेल केले.

30 वर्षीय महिला अधिकाऱ्याने 18 जुलै रोजी दिलेल्या तक्रारीत नमूद केले केले आहे की, 23 जून ते 10 जुलै दरम्यान प्रशिक्षणावेळी उदय कृष्ण रेड्डी यांनी तिला त्रास दिला. त्यांनी अश्लील मेसेज पाठवले, धमक्या दिल्या आणि तिचा खाजगी व्हिडिओ रेकॉर्ड करून तिच्या पतीला पाठवल्याचा आरोपही करण्यात आला आहे. या प्रकरणी हैद्राबाद सिटी पोलिसांच्या अट्टापुर पोलीस ठाण्यात गुन्हा दाखल करण्यात आला आहे. तक्रारदाराच्या म्हणण्यांनुसार, आरोपीने सोशलमीडियाद्वारे अश्लील मेसेज पाठवून छळ सुरू केला, तसेच इतर लोकांसमोर तिचा अपमान केला आणि खोटे आरोपही केले.

महिला अधिकाऱ्याने पुढे सांगितले की, आरोपीने तिला धमकावून तिचे वैयक्तिक मेसेज दाखवण्यास भाग पाडले. तिचा मोबाईल हिसकावून पासवर्ड सांगायला लावला. तसेच खाजगी व्हिडिओ रेकॉर्ड करून तो तिच्या नवऱ्याला पाठवू ब्लॅकमेल केल्याचा आरोप आहे. तक्रारीनुसार, ९ जुलै रोजी आरोपीने तिला जबरदस्तीने खोलीत नेले, तिचे केस ओढले, गळा दाबण्याचा प्रयत्न केला आणि चाकू दाखवून बाहेर जाऊ दिले नाही. त्यानंतर १० जुलैलाही तिच्यावर मारहाण केल्याचा आरोप आहे. ८ जुलै रोजी तिला नको तिथे स्पर्श केल्याचाही उल्लेख तक्रारीत आहे.

कोण आहे IPS अधिकारी कृष्ण रेड्डी?

उदय कृष्ण रेड्डी यांचा जन्म प्रकाशम जिल्ह्यातील सिंगरायकोंडा मंडलातील उल्लापालेम गावात झाला. ते लहान असतानाच त्यांच्या आई-वडिलांचे निधन झाले. त्यांचे संगोपन आजी रमणम्मा यांनी केले. आर्थिक अडचणींवर मात करत त्यांनी शिक्षण पूर्ण केले. शिक्षणादरम्यान त्यांनी लॅब टेक्निशियन म्हणूनही काम केले. २०१२ मध्ये ते कॉन्स्टेबल म्हणून पोलिस दलात दाखल झाले होते. त्यानंतर त्यांनी नोकरी सोडून यूपीएससीची UPSC तयारी सुरू केली. २०१९, २०२१ आणि २०२२ मध्ये अपयश आल्यानंतर त्यांनी २०२३ मध्ये यूपीएससी परीक्षा उत्तीर्ण केली. २०२४ मध्ये त्यांनी ऑल इंडिया रँक ३५० मिळवत आयपीएस पदाला गवसणी घातली.