(अभिजीत देशमुख,कल्याण )

Dombivli Police Arrested Thieves Crime :

कल्याण पत्रिपुल कचोरे येथील ६० फुटी रस्त्यावरील गावदेवी मंदिरातील देवीच्या चांदीच्या पादुका चोरट्यांनी चोरून नेल्या होत्या. या प्रकरणाचा तपास टिळकनगर पोलिसांकडे होता. पोलिसांनी गुन्हा दाखल करत ३ चोरट्यांच्या नवी मुंबईच्या तुर्भे झोपडपट्टीतून अटक केलीय. राजेश उर्फ राजू वंजारे , कैलास निशाद , आणि फारूख अली मोहम्मद हनीफ शेख, अशी अटक आरोपींची नावे आहेत. (Latest News)

पादूका चोरी केल्यानंतर पळण्यासाठी चोरट्यांनी एका रिक्षाचा वापर केला होता. या रिक्षाचा नंबर पोलिसांच्या हाती लागला. त्या रिक्षाच्या नंबर आधारे या चोरट्यांपर्यंत पोलीस पोहचले.अटक केलेल्या आरोपींकडून एक किलो वजनाच्या चांदीच्या ३० हजार रूपये किंमतीच्या पादुका हस्तगत करण्यात आल्या आहेत.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

कचोरे गावाबाहेर रेल्वे लाईनला लागून ९० फुटी रस्त्यावर गावदेवी मातेचे मंदिर आहे. शुक्रवारी २२ मार्च रोजी दुपारी २ वाजण्याच्या सुमारास या मंदिरात भक्त म्हणून दोन चोरटे शिरले. त्यांनी देवीची पूजा करत देवीच्या मूर्ती समोरील चांदीचा पादुका चोरून नेल्या. मंदिरातील सीसीटीव्ही कॅमेऱ्यात चोरीचा हा प्रकार कैद झाला होता.

पादुका चोरीला गेल्याचे लक्षात येताच या प्रकरणी ग्रामस्थांनी टिळकनगर पोलिसांनी गुन्हा दाखल करत तपास सुरू केला.पोलिसांनी परिसरातील सीसीटीव्ही तपासले असता चोरटे रिक्षातून पळून गेल्याचे समोर आले. या रिक्षाच्या नंबरवरून चोरट्यांचा शोध सुरू केला. तिघेही नवी मुंबई येथील तुर्भे झोपडपट्टीत लपल्याची माहिती कळताच या परिसरात सापळा रचत पळून जाण्याचा बेतात असणाऱ्या तिघांना अटक केली.